ଭୋପାଳ(ଆମ ଟିଭି): ଭାରତରେ ବଢିବ ଚିତା ବାଘଙ୍କ ବଂଶ । ପୁଣି ଭାରତକୁ ଆସୁଛନ୍ତି ୧୨ଟି ଚିତା । ଦ୍ବିତୀୟ ପର୍ୟ୍ୟାୟରେ ଆସନ୍ତା ଫେବୃଆରୀ ୧୮ରେ ଭାରତ ଆସିବେ ୧୨ ଚିତା । ସେମାନଙ୍କ ମଧ୍ୟରୁ ୭ଟି ପୁରୁଷ ଓ ୫ଟି ମହିଳା ଚିତା ରହିଛନ୍ତି । ଦକ୍ଷିଣ ଆଫ୍ରିକାରୁ ଆସୁଥିବା ନୂଆ ଅତିଥିଙ୍କୁ ମଧ୍ୟ ପ୍ରଦେଶ କୁନୋ ଜାତୀୟ ଉଦ୍ୟାନରେ ରଖାଯିବ । ୧୨ ଚିତାଙ୍କୁ ଆଣିବା ପାଇଁ ଆଜି ସକାଳୁ ହିଣ୍ଡନ ଏୟାରବେସ୍ରୁ ଦକ୍ଷିଣ ଆଫ୍ରିକା ଅଭିମୁଖେ ଭାରତୀୟ ବାୟୁସେନାର ସି ୧୭ ଗ୍ଲୋବମାଷ୍ଟର ଉଡାଣ ଆରମ୍ଭ କରିଛି ।
ଆସନ୍ତା ଫେବୃଆରୀ ୧୮ରେ କେନ୍ଦ୍ରମନ୍ତ୍ରୀ ଭୁପେନ୍ଦ୍ର ଯାଦବ ଓ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହ୍ବାନ କୁନୋ ଜାତୀୟ ଉଦ୍ୟାନରେ ଚିତାକୁ ଛାଡିବେ । ଶନିବାର ସକାଳେ ମଧ୍ୟପ୍ରଦେଶର ଗ୍ବାଲିଅର ବିମାନ ବନ୍ଦରରେ ପ୍ରଥମେ ଚିତା ପହଞ୍ଚିବେ । ଏହାର ୩୦ ମିନିଟ ପରେ ଭାରତୀୟ ବାୟୁସେନାର ସ୍ବତନ୍ତ୍ର ହେଲିକପ୍ଟର ଚିତାଙ୍କୁ ୧୬୫ କିଲୋମିଟର ଦୂର ଶ୍ୟୋପୁର ଜିଲ୍ଲାର କୁନୋରେ ଛଡାଯିବ । ଚିତାଙ୍କ ସ୍ଥାନାନ୍ତରଣ ପାଇଁ ଗତ ମାସରେ ଭାରତ ଓ ଦକ୍ଷିଣ ଆପ୍ରିକା ମଧ୍ୟରେ ଚୁକ୍ତି ସ୍ବାକ୍ଷର ହୋଇଥିଲା । ପ୍ରତିଟି ଚିତାକୁ ସ୍ଥାନାନ୍ତରଣ କରିବା ପାଇଁ ଭାରତକୁ ୩୦୦୦ ଆମେରିକୀୟ ଡଲାର ଖର୍ଚ୍ଚ କରିବାକୁ ପଡିବ ।