ନୂଆଦିଲ୍ଲୀ (ଆମ ଟିଭି): ରାତି ପାହିଲେ ଦେଶ ପାଳିବ ୭୬ ତମ ସ୍ୱାଧୀନତା ଦିବସ । ଲାଲକିଲ୍ଲାରେ ପତାକା ଉତ୍ତୋଳନ କରିବା ସହ ଦେଶବାସୀଙ୍କୁ ସମ୍ବୋଧନ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଦେଶ ସ୍ୱାଧୀନତାର ୭୫ ବର୍ଷ ପୂର୍ତ୍ତି ଉତ୍ସବକୁ ଆଜାଦି କା ଅମୃତ ମହୋତ୍ସବ ଭାବେ ପାଳନ କରୁଛି ସାରା ଦେଶ। ଏଥିସହ ସାରା ଦେଶରେ ଜାରି ରହିଛି ହର ଘର ତ୍ରିରଙ୍ଗା ଅଭିଯାନ।
ତେବେ ଏଥର ମଧ୍ୟ ସାମାନ୍ୟ କରୋନା କଟକଣା ମଧ୍ୟରେ ଲାଲକିଲ୍ଲାରେ ଆୟୋଜନ ହେଉଥିବା ସ୍ୱାଧୀନତା ଦିବସ ଉତ୍ସବରେ ଜାତୀୟ ସଂଗୀତ ଗାନ ସହ ଜାତୀୟ ପତାକା ଉତ୍ତୋଳନ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହାପରେ ସେ ଦେଶବାସୀଙ୍କୁ ସମ୍ବୋଧିତ କରିବେ । ମୋଦି ସର୍ବଦା ଲାଲକିଲ୍ଲାରୁ ସମ୍ବୋଧନ ବେଳେ କିଛି ନା କିଛି ବଡ ଘୋଷଣା କରିଆସୁଛନ୍ତି। ତେଣୁ ଏଥର ମଧ୍ୟ ଏକ ବଡ ଘୋଷଣା କରାଯାଇପାରେ ବୋଲି ଅନୁମାନ କରାଯାଉଛି।
ସ୍ୱାଧିନତା ଦିବସ ପାଇଁ ରାଜଧାନୀ ଦିଲ୍ଲୀ ସମେତ ସାରା ଦେଶରେ ହୋଇଛି କଡ଼ା ସୁରକ୍ଷା ବ୍ୟବସ୍ଥା। ଦିଲ୍ଲୀର ସମସ୍ତ ୮ଟି ଜାକ ସୀମା ସମେତ ସହରର ବ୍ୟସ୍ତତମ ବଜାର ଓ ଅଞ୍ଚଳର ସୁରକ୍ଷା କଡାକଡ଼ି କରାଯାଇଛି। କାର୍ୟ୍ୟକ୍ରମ ପାଳନ ବେଳେ ଡ୍ରୋନ ଦ୍ୱାରା ଆକ୍ରମଣ ଆଶଙ୍କାକୁ ଦୃଷ୍ଟିରେ ରଖି ଡ୍ରୋନ ନିରୋଧି ପ୍ରଣାଳୀ ମୁତୟନ କରାଯାଇଛି।