*ସ୍ବପ୍ନର ସୌଦାଗର ବସନ୍ତ ନାୟକ ଙ୍କ ୮୬ତମ ଜନ୍ମ ଜୟନ୍ତୀ ଉତ୍ସବ ପାଳିତ*

ଭୁବନେଶ୍ୱର :ଗତ ୧୬ ଜାନୁଆରୀ ରେ ଭୁବନେଶ୍ୱରସ୍ଥିତ ଜୟଦେବ ଭବନ ଠାରେ ଓଡ଼ିଆ ଚଳଚ୍ଚିତ୍ର ଜଗତର ପ୍ରବାଦ ପୁରୁଷ ବିଶିଷ୍ଟ ପ୍ରଯୋଜକ, ସ୍ୱପ୍ନର ସୌଦାଗର ବସନ୍ତ ନାୟକ ଙ୍କ ୮୬ତମ ଜନ୍ମ ଜୟନ୍ତୀ ମହା- ସମାରୋହରେ ପାଳିତ ହୋଇଯାଇଛି । ଏହି ସମାରୋହକୁ ପ୍ରସିଦ୍ଧ ଅଭିନେତା ଉତ୍ତମ ମହାନ୍ତି, ବିଶିଷ୍ଟ ପ୍ରଯୋଜକ ତଥା ଅଭିନେତା ପ୍ରଦ୍ୟୁମ୍ନ ଲେଙ୍କା ପ୍ରଦୀପ ପ୍ରଜ୍ବଳନ କରିବା ସହିତ ବସନ୍ତ ନାୟକଙ୍କ ଫଟୋ ଚିତ୍ରରେ ମାଲ୍ୟାର୍ପଣ କରିଥିଲେ । ଅନ୍ୟମାନଙ୍କ ମଧ୍ୟରେ ଓଲିଉଡ଼ର ସୁପରଷ୍ଟାର ଅନୁଭବ ମହାନ୍ତି, ଅରିନ୍ଦମ, ବୁଦ୍ଧାଦିତ୍ୟ ମହାନ୍ତି ପ୍ରମୁଖ ଯୋଗଦେଇ ବସନ୍ତ ନାୟକଙ୍କୁ ଶ୍ରଦ୍ଧାଞ୍ଜଳି ଜଣେଇବା ପୂର୍ବକ ବସନ୍ତ ନାୟକ ନାମରେ ରାଜ୍ୟ ର ଦୁଇ ପ୍ରମୁଖ ସହର ଯଥା କଟକ- ଭୁବନେଶ୍ୱର ମଧ୍ୟରେ ଏକ ରାସ୍ତାର ନାମକରଣ କରିବା ସହିତ ତାଙ୍କର ଏକ ପୁର୍ଣ୍ଣ୍ୟାୟ ପ୍ରତିମୂର୍ତ୍ତି ନିର୍ମାଣ କରିବା ପାଇଁ ମତପୋଷଣ କରିଥିଲେ । ବସନ୍ତ ନାୟକଙ୍କୁ ଚଳଚ୍ଚିତ୍ର ଜଗତକୁ ଆଣିଥିବା ଯାଯାବର ଚଳଚ୍ଚିତ୍ର ର ପ୍ରଯୋଜକ ଶ୍ରୀଯୁକ୍ତ ବିଜୟ କୁମାର ପଟ୍ଟନାୟକ ଙ୍କୁ ଏଇ ଅବସରରେ “ବସନ୍ତ ନାୟକ ସ୍ମୃତି ସମ୍ମାନ” ପ୍ରଦାନ କରାଯାଇଥିଲା । ସଭାକାର୍ଯ୍ୟ ପରେ ବସନ୍ତ ନାୟକ ଙ୍କ ପ୍ରଯୋଜିତ ଚଳଚ୍ଚିତ୍ର ତଥା ବ୍ରଜରାଜ ମୁଭିଜ ପ୍ରଯୋଜିତ ଚଳଚ୍ଚିତ୍ର ଗୁଡିକର ସୁପର ଧୁପର ହିଟ ଗୀତ ଗୁଡିକୁ ନେଇ ସେଇ ଗୀତ ମାଧ୍ୟମରେ ଓଡିଶା ର ଜନପ୍ରିୟ କଣ୍ଠ ଶିଳ୍ପୀ ମାନେ ତାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ସେମାନଙ୍କ ମଧ୍ୟରେ ଥିଲେ ଟି ସୌରୀ, ସୁଭାଶିଷ ମହାକୁଡ଼, ନାଜିଆ ଆଲାମ, ଲକ୍ଷ୍ମୀକାନ୍ତ ପାଳିତ, ବନ୍ଦିଜ, ଚିତ୍ରଭାନୁ ମହାନ୍ତି, ରଶ୍ମିତା ଦାଶ, ବର୍ଣ୍ଣଳୀ ହୋତା, ପ୍ରମୁଖ । ବସନ୍ତ ନାୟକ ଙ୍କ ଚଳଚ୍ଚିତ୍ର ଗୀତ ର ତାଳେ ତାଳେ ସଭାଗୃହରେ ଉପସ୍ଥିତ ସମସ୍ତ ଦର୍ଶକ ତଥା ଶ୍ରୋତା ମାନେ ଝୁମି ଉଠିଥିଲେ ଏବଂ ବସନ୍ତ ନାୟକ ସେଇ ଚଳଚ୍ଚିତ୍ର ଗୁଡିକୁ ମନେ ପକେଇଥିଲେ । ଏଇ କାର୍ଯ୍ୟକ୍ରମ ର ସୁପରିଚାଳନା କରିଥିଲେ ବସନ୍ତ ନାୟକଙ୍କ ସୁପୁତ୍ର ତଥା ପ୍ରଯୋଜକ ସଞ୍ଜୟ ନାୟକ (ଟୁଟୁ) ।

ଏଇ ଅବସରରେ ସଞ୍ଜୟ ନାୟକଙ୍କ ଦୁଇ ପୁତ୍ର ରାହୁଲ ଓ ପ୍ରେମ ଙ୍କ ପ୍ରଯୋଜିତ “Cineମା” ଚଳଚ୍ଚିତ୍ର ର ପୋଷ୍ଟର ଏବଂ ଟିଜର ଉନ୍ମୋଚିତ ହୋଇଥିଲା । ଓଡ଼ିଆ ସିନେମା ଜଗତକୁ ବସନ୍ତ ନାୟକଙ୍କ ଅବଦାନ ସମ୍ପର୍କରେ ଉପସ୍ଥିତ ଅନେକ ଜ୍ଞାନୀଗୁଣି, ସାହିତ୍ୟିକ ତଥା ଚଳଚ୍ଚିତ୍ର ଜଗତ ସହିତ ଜଡିତ ପ୍ରଯୋଜକ ଓ ନିର୍ଦ୍ଦେଶକମାନେ ଆଲୋଚନା କରିଥିଲେ । ସୁନ୍ଦର ଶବ୍ଦ ସଂଯୋଜନା ସହିତ ବିଭିନ୍ନ ଅଙ୍ଗେନିଭା କଥା କୁ ନେଇ କାର୍ଯ୍ୟକ୍ରମର ମଞ୍ଚ ପରିଚାଳନା କରିଥିଲେ ଓଡ଼ିଆର ବିଶିଷ୍ଟ ଗୀତିକାର, ସଂଳାପକାର ତଥା ଉପସ୍ଥାପକ ବିଜୟ ମଲ୍ଲ । ପ୍ରକୃତରେ ରୂପେଲି ପର୍ଦ୍ଦାର ମହାନାୟକ, ସ୍ୱପ୍ନର ସୌଦାଗର ବସନ୍ତ ନାୟକ ଓଡ଼ିଆ ଚଳଚ୍ଚିତ୍ର ବିତରଣ, ପ୍ରଯୋଜନା ତଥା ନିର୍ମାଣ କ୍ଷେତ୍ରରେ ଥିଲେ ଏକରେ ଅନେକ, ପୁନଶ୍ଚ ଅନେକରେ ଏକ ଏକଥା କେହି ଅସ୍ବୀକାର କରିନାହାନ୍ତି ।