ନୂଆଦିଲ୍ଲୀ: ବିହାରରେ ବନ୍ୟା ପରିସ୍ଥିତି ଆହୁରି ସଙ୍ଗୀନ ହେବାରେ ଲାଗିଛି। ଗଙ୍ଗା ସମେତ ରାଜ୍ୟର ୮ଟି ପ୍ରମୁଖ ନଦୀ ଫୁଲିବାରେ ଲାଗିଥିବା ବେଳେ ୧୪ଟି ଜିଲ୍ଲାରେ ବନ୍ୟା ସ୍ଥିତି ଗମ୍ଭୀର ରହିଛି। ଏହାଦ୍ୱାରା ପ୍ରାୟ ୩୫.୮୯ ଲକ୍ଷରୁ ଅଧିକ ଲୋକ ପ୍ରଭାବିତ ହୋଇଛନ୍ତି। ଭାଗଲପୁର ଜିଲ୍ଲାର ସୁଲତାନଗଞ୍ଜଠାରେ ଗଙ୍ଗା ନଦୀ ନିଜର ସର୍ବୋଚ୍ଚ ବିପଦ ସଙ୍କେତ ଟପିଯାଇଥିବାରୁ ତଳିଆ ଅଞ୍ଚଳଗୁଡ଼ିକ ପାଇଁ ସତର୍କ ସୂଚନା ଜାରି କରାଯାଇଛି।
କୋଶୀ, ଗଣ୍ଡକ ଏବଂ ଘାଘରା ନଦୀ ମଧ୍ୟ ବିପଦ ସଙ୍କେତ ଉପରେ ପ୍ରବାହିତ ହେଉଛନ୍ତି। ସାରଣ ଜିଲ୍ଲାରେ ମାହୀ ନଦୀ ଉପରେ ନିର୍ମିତ ଜମିନ୍ଦାରୀ ବାନ୍ଧ ଭାଙ୍ଗିଯିବା ଯୋଗୁଁ ସ୍ଥାନୀୟ ଅଞ୍ଚଳରେ ଜଳବନ୍ଦୀ ସ୍ଥିତି ସୃଷ୍ଟି ହୋଇଛି। ପ୍ରଶାସନିକ ସୂଚନା ଅନୁଯାୟୀ, ପାଟଣା, ଭୋଜପୁର, ସାରଣ, ବୈଶାଳୀ, ଭାଗଲପୁର, ବେଗୁସରାଇ, ବକ୍ସର, ସମସ୍ତୀପୁର, ମୁଙ୍ଗେର, କାଟିହାର, ଲଖିସରାଇ, ଖଗଡ଼ିଆ, ପୂର୍ଣ୍ଣିଆ ଏବଂ ଅରୱଲ ଜିଲ୍ଲାରେ ବନ୍ୟା ଯୋଗୁଁ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି।
ଏହି ବନ୍ୟା ମଧ୍ୟରେ ବୈଶାଳୀଠାରେ ଗଙ୍ଗା ନଦୀରେ ୧୧ ଜଣ ଯାତ୍ରୀଙ୍କୁ ନେଇ ଯାଉଥିବା ଏକ ଡଙ୍ଗା ବୁଡ଼ିଯାଇଛି। ଉଦ୍ଧାରକାରୀ ଦଳ ୯ ଜଣଙ୍କୁ ସୁରକ୍ଷିତ ଉଦ୍ଧାର କରିଥିବା ବେଳେ ଜଣଙ୍କର ମୃତ୍ୟୁ ଘଟିଛି ଏବଂ ଆଉ ଜଣେ ନିଖୋଜ ଅଛନ୍ତି। ପାଣିପାଗ ବିଭାଗ ଅନୁସାରେ, ସେପ୍ଟେମ୍ବର ମାସରେ ବିହାରରେ ଏପର୍ଯ୍ୟନ୍ତ ୭୯.୬ ମିଲିମିଟର ବର୍ଷା ରେକର୍ଡ କରାଯାଇଛି, ଯାହା ସ୍ୱାଭାବିକଠାରୁ ୩୧ ପ୍ରତିଶତ ଅଧିକ।