ନୂଆଦିଲ୍ଲୀ: ଗିରଫଦାରୀ ପ୍ରକ୍ରିୟାକୁ ନେଇ ସୁପ୍ରିମକୋର୍ଟ ଏକ ଗୁରୁତ୍ୱପୂର୍ଣ୍ଣ ଆଦେଶ ଦେଇଛନ୍ତି। ଏଣିକି କୌଣସି ବ୍ୟକ୍ତିଙ୍କୁ ଗିରଫ କରିବା ପୂର୍ବରୁ ପୁଲିସ୍ ତାଙ୍କୁ ଗିରଫଦାରୀର ସ୍ପଷ୍ଟ କାରଣ ଲିଖିତ ଆକାରରେ ଜଣାଇବ। ନଚେତ୍ ଏହି କାର୍ଯ୍ୟାନୁଷ୍ଠାନକୁ ସମ୍ପୂର୍ଣ୍ଣ ବେଆଇନ ଓ ଅସାମ୍ବିଧାନିକ ବିବେଚନା କରାଯିବ।
ଜଷ୍ଟିସ୍ ଉଜ୍ଜ୍ୱଳ ଭୂୟାଁ ଓ ଜଷ୍ଟିସ୍ ଅତୁଲ ଚନ୍ଦୁରକରଙ୍କୁ ନେଇ ଗଠିତ ଖଣ୍ଡପୀଠ ଶିରୋମଣି ଅକାଳୀ ଦଳର ନେତା ଜସକରଣଜିତ ସିଂହଙ୍କ ଏକ ମାମଲାର ଶୁଣାଣି କରି ଏହି ନିର୍ଦ୍ଦେଶ ଦେଇଛନ୍ତି। ସମ୍ବିଧାନର ଅନୁଚ୍ଛେଦ ୨୨(୧) ଅନୁଯାୟୀ, ଗିରଫଦାରୀର କାରଣ ସରଳ ଭାଷାରେ ଲିଖିତ ଭାବେ ଦେବା ଅଭିଯୁକ୍ତଙ୍କର ମୌଳିକ ଅଧିକାର। ଅଭିଯୁକ୍ତ ଚାହିଁଲେ ଏହାର ଏକ ନକଲ ତାଙ୍କୁ ତୁରନ୍ତ ଯୋଗାଇ ଦିଆଯିବ। ବେଆଇନ ଗିରଫଦାରୀ ପରେ ମୁକ୍ତ ହୋଇଥିବା ଅଭିଯୁକ୍ତଙ୍କୁ ପୁଲିସ୍ ସିଧାସଳଖ ପୁନର୍ବାର ଗିରଫ କରିପାରିବ ନାହିଁ। ଏଥିପାଇଁ ମାଜିଷ୍ଟ୍ରେଟ୍ଙ୍କ ପୂର୍ବ ଅନୁମତି ଏବଂ ବରିଷ୍ଠ ଅଧିକାରୀଙ୍କ ସହମତି ନେବାକୁ ପଡ଼ିବ। ନିୟମ ଉଲ୍ଲଂଘନ କରିଥିବା ପୁଲିସ୍ ଅଧିକାରୀଙ୍କ ବିରୋଧରେ ବିଭାଗୀୟ ତଦନ୍ତ ହେବ ଏବଂ ମାମଲାର ତଦନ୍ତ ଭାର ଅନ୍ୟ ଜଣେ ଅଧିକାରୀଙ୍କୁ ହସ୍ତାନ୍ତର କରାଯିବ।
ସୂଚନା ଥାଉ କି, ଅକାଳୀ ଦଳ ନେତା ଜସକରଣଜିତ ସିଂହଙ୍କ ବିରୋଧରେ ନାବାଳିକା ଯୌନ ନିର୍ଯାତନା ଭଳି ସଂଗୀନ ଅଭିଯୋଗ ଥିଲା। ମାତ୍ର ଗିରଫ ସମୟରେ ପୁଲିସ୍ ତାଙ୍କୁ କୌଣସି ଲିଖିତ କାରଣ ଦେଇ ନଥିଲା। ପଞ୍ଜାବ ଓ ହରିଆଣା ହାଇକୋର୍ଟ ସ୍ଥାନୀୟ କୋର୍ଟଙ୍କ ଜସକରଣଜିତଙ୍କୁ ମୁକ୍ତ କରିବା ଆଦେଶ ଉପରେ ରୋକ୍ ଲଗାଇବା ପରେ ସେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ନିୟମ ଅବମାନନା କାରଣରୁ ସୁପ୍ରିମକୋର୍ଟ ତାଙ୍କ ଗିରଫଦାରୀକୁ ବେଆଇନ ଘୋଷଣା କରିଛନ୍ତି।