ରାଜନଗର: ରାଜନଗରର ଶୁଭଶ୍ରୀଙ୍କ ରହସ୍ୟମୟ ନିଖୋଜକୁ ୬ଦିନ ବିତିଲାଣି । ମିଳୁନି ମୃତଦେହ, ବଢ଼ୁଛି ସସ୍ ପେନ୍ସ। ରାଜନଗର ଥାନାରେ ଅଟକ ୮ ଜଣଙ୍କୁ ଛାଡ଼ିଲା ପୋଲିସ । କେନ୍ଦ୍ରାପଡ଼ା ଜିଲ୍ଲା ରାଜନଗର ଥାନା ରାଜୁପୁର ଗାଁର ଶୁଭଶ୍ରୀ ଦାସଙ୍କ ରହସ୍ୟଜନକ ନିଖୋଜ ଘଟଣା ଉପରୁ ଏପର୍ଯ୍ୟନ୍ତ ପରଦା ହଟିପାରିନାହିଁ । ଶୁଭଶ୍ରୀଙ୍କ ମୃତଦେହରେ ପଥର ବାନ୍ଧି ହଂସୁଆ ନଈକୁ ଫିଙ୍ଗିଦିଆଯାଇଥିବା ପ୍ରତ୍ୟକ୍ଷଦର୍ଶୀ ଅଭିଯୋଗ କରୁଛନ୍ତି।
ସେପଟେ ପୋଲିସ ଛାଡିବା ପରେ ଗଣମାଧ୍ୟମକୁ ଶୁଭଶ୍ରୀଙ୍କ ବାପା ପ୍ରତିକ୍ରିୟା ରଖି କହିଛନ୍ତି, ମୋ ଝିଅ ନିଖୋଜ ଅଛି । ଆମେ ତାର ମୃତଦେହକୁ ଏ ପର୍ଯ୍ୟନ୍ତ ପାଇନୁ । ହଂସୁଆ ନଦୀରେ ୩ ଦିନ ଧରି ଅଗ୍ନିଶମ ବାହିନୀର ଖୋଜାଖୋଜି ଚାଲିଛି । ହେଲେ ଏଯାଏ ମୃତଦେହର କୌଣସି ସନ୍ଧାନ ମିଳିପାରିନାହିଁ । ସେପଟେ ସୋସିଆଲ ମିଡିଆରୁ ମିଳିଥିବା ଏକ ମୃତଦେହର ଫଟୋକୁ ନେଇ ଚର୍ଚ୍ଚା ଚାଲିଛି । ଶୁଭଶ୍ରୀ ଏବେ ମୃତ ନା ଜୀବିତ ? ନିଖୋଜର କାରଣ କଣ । ଯଦି ତାଙ୍କୁ ହତ୍ୟା କରାଯାଇଛି କାରଣ କଣ ହୋଇପାରେ । ସମୁଦାୟ ଘଟଣା ଅଡୁଆସୂତାରେ ଛନ୍ଦି ହୋଇ ରହିଛି ।