ନୂଆଦିଲ୍ଲୀ : ଜନ୍ତରମନ୍ତରରେ ଆନ୍ଦୋଳନର ମାନ୍ୟତା ରଦ୍ଦ । ଦେଶର ରାଜଧାନୀ ଦିଲ୍ଲୀରେ ଆନ୍ଦୋଳନ ଓ ପ୍ରତିବାଦର ଅନ୍ୟତମ ପ୍ରମୁଖ ସ୍ଥାନ ଜନ୍ତରମନ୍ତରକୁ ନେଇ ବଡ଼ ନିଷ୍ପତ୍ତି । ଏହାକୁ ସରକାରୀ ଭାବେ ଚିହ୍ନଟ ବିକ୍ଷୋଭ ସ୍ଥଳ ତାଲିକାରୁ ବାଦ୍ ଦିଆଯାଇଛି। ଦିଲ୍ଲୀ ପୋଲିସ କମିସନର ଅନୁରାଗ କୁମାରଙ୍କ ନୋଟିସ୍ ଅନୁସାରେ, ଜନ୍ତରମନ୍ତର ବଦଳରେ ରାମଲୀଳା ମୈଦାନ, ବୁରାରୀ ଗ୍ରାଉଣ୍ଡ ଏବଂ ପୂର୍ବ ଦିଲ୍ଲୀର ସିବିଡି ଗ୍ରାଉଣ୍ଡକୁ ନୂଆ ବିକ୍ଷୋଭ ସ୍ଥଳ ଭାବେ ଚିହ୍ନଟ କରାଯାଇଛି।
କେନ୍ଦ୍ର ଗୃହ ମନ୍ତ୍ରଣାଳୟ ଗଠନ କରିଥିବା ଏକ କମିଟିର ସୁପାରିସ ଆଧାରରେ ଏହି ପଦକ୍ଷେପ ନିଆଯାଇଛି। ତେବେ ଜନ୍ତରମନ୍ତରର ମାନ୍ୟତା ପ୍ରତ୍ୟାହାର ପରେ ଏବେ ପ୍ରଶ୍ନ ଉଠୁଛି ଯେ ଏତେ ବର୍ଷ ଧରି ଏହା କିପରି ଦେଶର ପ୍ରତିବାଦର ପ୍ରମୁଖ କେନ୍ଦ୍ର ପାଲଟିଥିଲା ଏବଂ ଏହାର ମାନ୍ୟତା ରଦ୍ଦ କରିବାର ଆଇନଗତ ପ୍ରକ୍ରିୟା କ’ଣ? ଜନ୍ତରମନ୍ତର ପ୍ରାୟ ୩୩ ବର୍ଷ ଧରି, ଅର୍ଥାତ୍ ୧୯୯୩ ମସିହାରୁ ଦିଲ୍ଲୀର ପ୍ରମୁଖ ପ୍ରତିବାଦ ସ୍ଥଳ ଭାବେ ବ୍ୟବହୃତ ହୋଇଆସୁଥିଲା।
ଜନ୍ତରମନ୍ତରକୁ ପ୍ରତିବାଦ ପାଇଁ ବ୍ୟବହାର କରାଯାଇଥିଲା। ପରବର୍ତ୍ତୀ ସମୟରେ ପୋଲିସର ଷ୍ଟାଣ୍ଡିଂ ଅର୍ଡର ମାଧ୍ୟମରେ ଏଠାରେ ବିକ୍ଷୋଭ ଆୟୋଜନର ନିୟମ ସ୍ଥିର କରାଯାଇଥିଲା। ୨୦୧୭ରେ ଶବ୍ଦ ପ୍ରଦୂଷଣ, ପରିମଳ ଓ ସ୍ଥାନୀୟ ବାସିନ୍ଦାଙ୍କ ଅସୁବିଧାକୁ ଦର୍ଶାଇ ଜାତୀୟ ଗ୍ରୀନ୍ ଟ୍ରିବ୍ୟୁନାଲ୍ ଜନ୍ତରମନ୍ତରରେ ବିକ୍ଷୋଭ ଉପରେ ରୋକ୍ ଲଗାଇଥିଲେ। କିନ୍ତୁ ୨୦୧୮ ଜୁଲାଇରେ ସୁପ୍ରିମକୋର୍ଟ ସମ୍ପୂର୍ଣ୍ଣ ନିଷେଧାଦେଶକୁ ହଟାଇଥିଲେ।
ଶାନ୍ତିପୂର୍ଣ୍ଣ ପ୍ରତିବାଦ ନାଗରିକଙ୍କ ଅଧିକାର ହୋଇଥିଲେ ମଧ୍ୟ ଜନସାଧାରଣଙ୍କ ସୁବିଧା ଓ ଆଇନଶୃଙ୍ଖଳା ପାଇଁ ଏହାକୁ ନିୟନ୍ତ୍ରଣ କରାଯାଇପାରିବ ବୋଲି କୋର୍ଟ କହିଥିଲେ।ଏଥର ଜନ୍ତରମନ୍ତରର ମାନ୍ୟତା ପ୍ରତ୍ୟାହାର ପାଇଁ କେନ୍ଦ୍ର ଗୃହ ମନ୍ତ୍ରଣାଳୟ ଏକ କମିଟି ଗଠନ କରିଥିଲା। କମିଟି ବିକଳ୍ପ ସ୍ଥାନ ସମ୍ପର୍କରେ ସୁପାରିସ କରିବା ପରେ ଦିଲ୍ଲୀ ପୋଲିସ କମିସନର ନୂଆ ନୋଟିସ୍ ଜାରି କରିଛନ୍ତି।
ଏଥିରେ ୨୮ ଏପ୍ରିଲ ୨୦୨୨ର ପୂର୍ବ ଷ୍ଟାଣ୍ଡିଂ ଅର୍ଡରକୁ ଆଂଶିକ ସଂଶୋଧନ କରାଯାଇଛି। ନୂଆ ତିନୋଟି ସ୍ଥାନରେ ବିକ୍ଷୋଭ ଆୟୋଜନ ପାଇଁ ପୃଥକ SOP ଜାରି ହେବ। ପୂର୍ବ ବ୍ୟବସ୍ଥାରେ ଜନ୍ତରମନ୍ତରରେ ବିକ୍ଷୋଭ ପାଇଁ ସାଧାରଣତଃ ୧୦ ଦିନ ପୂର୍ବରୁ ଡିସିପିଙ୍କ ଅନୁମତି ମାଗିବାକୁ ପଡ଼ୁଥିଲା ଏବଂ ସର୍ବାଧିକ ୧,୦୦୦ ଲୋକଙ୍କ ସମାବେଶକୁ ଅନୁମତି ଥିଲା। ନୂଆ ସ୍ଥାନଗୁଡ଼ିକ ପାଇଁ ଆବେଦନର ସମୟସୀମା, ଲୋକସଂଖ୍ୟା ଓ ଅନ୍ୟ ସର୍ତ୍ତ ସଂଶୋଧିତ SOPରେ ସ୍ପଷ୍ଟ ହେବ।