ମୁମ୍ବାଇ: ବଲିଉଡର ପ୍ରସିଦ୍ଧ ଅଭିନେତା ଅଜୟ ଦେବଗନ୍ଙ୍କ ମୁମ୍ବାଇର ଜୁହୁ ସ୍ଥିତ ବଙ୍ଗଳାରେ ବେଆଇନ ନିର୍ମାଣକୁ ନେଇ ବୃହନମୁମ୍ବାଇ ମ୍ୟୁନିସିପାଲ କର୍ପୋରେସନ୍ (ବିଏମସି) ପକ୍ଷରୁ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। କର୍ତ୍ତୃପକ୍ଷଙ୍କ ଅନୁମତି ବିନା ବଙ୍ଗଳା ଭିତରେ ବିଭିନ୍ନ ଅନ୍ତଃସ୍ଥଳ ପରିବର୍ତ୍ତନ, ପାଚେରି ନିର୍ମାଣ, ଝରକା ରୂପାନ୍ତରଣ ଏବଂ ଅନ୍ୟାନ୍ୟ ଗଠନମୂଳକ କାର୍ଯ୍ୟ ଚାଲିଥିବା ଅଭିଯୋଗରେ ବିଏମସି ଏହି ଭଙ୍ଗାରୁଜା କାର୍ଯ୍ୟ କରିଛି।
ଜୁହୁର କାପୋଲେ କୋ-ଅପରେଟିଭ୍ ହାଉସିଂ ସୋସାଇଟିରେ ଥିବା ଏହି ୭,୮୦୨ ବର୍ଗଫୁଟର ବିଶାଳ ବଙ୍ଗଳା ନିମନ୍ତେ ପୂର୍ବରୁ ସେପ୍ଟେମ୍ବର ୧୦ ତାରିଖରେ ମୁମ୍ବାଇ ମ୍ୟୁନିସିପାଲ କର୍ପୋରେସନ୍ ଆଇନର ଧାରା ୩୫୪ଏ ଅଧିନରେ ଏକ ଆନୁଷ୍ଠାନିକ ନୋଟିସ୍ ଜାରି କରାଯାଇଥିଲା। କାର୍ଯ୍ୟ ବନ୍ଦ କରିବା ଏବଂ ବୈଧ କାଗଜପତ୍ର ଦାଖଲ କରିବା ପାଇଁ ନିର୍ଦ୍ଦେଶ ଦିଆଯାଇଥିଲେ ହେଁ ନୋଟିସକୁ ଅବମାନନା କରି ନିର୍ମାଣ କାର୍ଯ୍ୟ ଜାରି ରହିଥିଲା। ଫଳରେ ଆଜି ପୌର କର୍ତ୍ତୃପକ୍ଷ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ବେଆଇନ ଭାବେ ନିର୍ମିତ ହୋଇଥିବା ଅଂଶଗୁଡ଼ିକୁ ହାତୁଡ଼ି ସାହାଯ୍ୟରେ ଭାଙ୍ଗି ଦେଇଛନ୍ତି।