ପୁଣି ଭାରତ ମହାସାଗରରେ ପ୍ରବେଶ କଲା ଚୀନର ଗୁପ୍ତଚର ଜାହାଜ

ନୂଆଦିଲ୍ଲୀ (ଆମ ଟିଭି): ପୁଣି ଭାରତ ମହାସାଗରରେ ଦେଖିବାକୁ ମିଳିଛି ଗୁପ୍ତଚର ଜାହାଜ । ଚୀନର ଏହି ଗୁପ୍ତଚର ଜାହାଜର ନାଁ ହେଉଛି ଉଆନ ଓ୍ବାଙ୍ଗ୍-୫ । ଚୀନର ଆଉ ଏକ ଗୁପ୍ତଚର ଜାହାଜ ଉଆନ ଓ୍ବାଙ୍ଗ୍-୬ ଭାରତ ମହାସାଗରରୁ ବିଦାୟ ନେବା ପରେ ଏହା ପହଞ୍ଚିଛି । ମିଳିଥିବା ସୂଚନା ଅନୁସାରେ ଚୀନର ହାଇନାନ ଦ୍ବୀପରେ ଥିବା ସାନ୍ୟା ବନ୍ଦର ଛାଡ଼ିବା ପରେ ଏହା ଭାରତ ମହାସାଗରରେ ପ୍ରବେଶ କରିଛି । ବାରମ୍ବାର ଚୀନର ଗୁପ୍ତଚର ଜାହାଜ ଭାରତ ମହାସାଗରରେ ପ୍ରବେଶ କରିବା କେବଳ ଭାରତ ନୁହେଁ ଆମେରିକାର ଚିନ୍ତା ମଧ୍ୟ ବଢାଇଦେଇଛି ।

ଚୀନ ନୌସେନା ପାଇଁ ଭାରତ ମହାସାଗରର ଭୂମିକା ଗୁରୁତ୍ବପୂର୍ଣ୍ଣ ରହିଆସିଛି । ଏହି ଅଂଚଳ ଦେଇ ଚୀନର ତୈଳ ଜାହାଜ ଯାଇଥାଏ । କିନ୍ତୁ ଏ ଅଂଚଳରେ ଭାରତୀୟ ନୌସେନାର ଆଧିପତ୍ୟ ଥିବାରୁ ଚୀନ ଚିନ୍ତାରେ ରହିଛି । ଏଣୁ ଏ ଅଂଚଳରେ ପ୍ରହରା ପାଇଁ ଚୀନ ବୁଡ଼ାଜାହାଜ ମୁତୟନ କରିବାକୁ ଚାହୁଁଛି ।