ନୂଆଦିଲ୍ଲୀ (ଆମ ଟିଭି): ଭାରତକୁ ଆସିଥିବା ୮ଟି ଚିତାକୁ ନେଇ ରାଜନୀତି ମଧ୍ୟ ସରଗରମ ହୋଇଛି । ଏହାକୁ ନେଇ ସରକାରଙ୍କୁ ବିରୋଧୀ ଟାର୍ଗେଟ କରୁଛନ୍ତି । ଆଫ୍ରିକାରୁ ଅଣାଯାଇଥିବା ୮ଟି ଚିତାଙ୍କ ଶିକାର ଲାଗି ‘କୁନୋ ଜାତୀୟ ଉଦ୍ୟାନ’କୁ ରାଜସ୍ଥାନରୁ ମୃଗ ଅଣାଯାଇଥିବା ଖବରକୁ ମଙ୍ଗଳବାର ଦିନ ମଧ୍ୟପ୍ରଦେଶ ସରକାର ଅସ୍ବୀକାର କରିଛନ୍ତି।
ରାଜସ୍ଥାନର ବିଷ୍ଣୋଇ ସମ୍ପ୍ରଦାୟ ମଧ୍ୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଚିଠି ଲେଖି ଜଣାଇଲେ ଯେ, ମରୁରାଜ୍ୟରେ ମୃଗ ବିଲୁପ୍ତ ହୋଇ ଆସୁଥିବାରୁ ଏଭଳି ଅଯର୍ଥାତ ନିଷ୍ପତ୍ତିର ପୁନର୍ବିଚାର କରାଯାଉ। ହରିୟାଣାର ଫତେବାଦସ୍ଥିତ ମିନି ସେକ୍ରେଟେରିଏଟ୍ ସମ୍ମୁଖରେ ବିଷ୍ଣୋଇ ସମ୍ପ୍ରଦାୟ ସଦସ୍ୟମାନେ ଧାରଣା ଦେବା ସହ ଉପରୋକ୍ତ ନିଷ୍ପତ୍ତି ବିରୋଧରେ ଜିଲ୍ଲାପାଳଙ୍କୁ ସ୍ମାରକ ପତ୍ର ମଧ୍ୟ ଦେଇଥିଲେ।
ମୃଗ ଅଣାଯିବା ରିପୋର୍ଟକୁ ଖଣ୍ଡନ କରି ମଧ୍ୟପ୍ରଦେଶ ବନ ବିଭାଗ ସ୍ପଷ୍ଟୀକରଣ ଜାରି କରିଛି। ଏଥିରେ ଉଲ୍ଲେଖ ଅଛି, ରାଜସ୍ଥାନରୁ ମଧ୍ୟପ୍ରଦେଶକୁ ମୃଗ ଅଣାଯାଇ ନାହିଁ। କାରଣ, ମୃଗ ଆଣିବା ପାଇଁ ରାଜ୍ୟ ଓ କେନ୍ଦ୍ର ସରକାରଙ୍କ ଅନୁମତି ଆବଶ୍ୟକ। ଏହା ବ୍ୟତିରେକେ, କୁନୋ ଜାତୀୟ ଉଦ୍ୟାନରେ ୨୦,୦୦୦ରୁ ଅଧିକ ମୃଗ ଅଛନ୍ତି। ବାହାରୁ ମୃଗ ଅଣାଯିବା ଖବର ମିଥ୍ୟା ବୋଲି ମଧ୍ୟପ୍ରଦେଶ ବନ ବିଭାଗ ଉକ୍ତ ସ୍ପଷ୍ଟୀକରଣରେ ଉଲ୍ଲେଖ କରିଛି।