‘ଡାବର୍ ଗ୍ରୁପ୍’ର ଅଧ୍ୟକ୍ଷ ଓ ନିର୍ଦେଶକଙ୍କ ନାଁରେ ଏଫ୍ଆଇଆର୍
ମୁମ୍ବାଇ: ‘ମହାଦେବ ବେଟିଙ୍ଗ୍ ଆପ୍’ ମାମଲାରେ ମୁମ୍ବାଇ ପୁଲିସ ଫାଇଲ୍ କରିଥିବା ‘ଏଫ୍ଆଇଆର୍’ରେ ଅଭିଯୁକ୍ତ ବୋଲି ଦର୍ଶାଯାଇଥିବା ୩୧ଜଣ ବ୍ୟକ୍ତିଙ୍କ ମଧ୍ୟରେ ‘ଡାବର୍ ଗ୍ରୁପ୍’ର ଅଧ୍ୟକ୍ଷ ମୋହିତ ବର୍ମନ୍ ଓ ନିର୍ଦେଶକ ଗୌରବ ବର୍ମନଙ୍କ ନାଁ ଥିବା କଥା ‘ଇଣ୍ଡିଆ ଟୁଡେ’ ରିପୋର୍ଟ କରିଛି।
‘ଏଫ୍ଆଇଆର୍’ରେ ମୋହିତ ବର୍ମନଙ୍କ ନାଁ ପାଖରେ ଥିବା ଠିକଣା ସ୍ଥାନରେ ‘ଫୋର୍ଟ ମୁମ୍ବାଇ’ ଉଲ୍ଲେଖ କରାଯାଇଛି। ‘ରୋଜିଷ୍ଟ୍ରାର୍ ଅଫ୍ କମ୍ପାନିଜ୍’ରେ ଏହି ଠିକଣାରେ ମୋହିତଙ୍କର ଗୋଟାଏ ନିବେଶ କମ୍ପାନିର ଅଫିସ୍ ଅବସ୍ଥିତ।
ସାମାଜିକକର୍ମୀ ପ୍ରକାଶ ବ୍ୟାଙ୍କର୍ ଫାଇଲ୍ କରିଥିବା ଅଭିଯୋଗ ଆଧାରରେ ନଭେମ୍ବର ୭ ତାରିଖ ଦିନ ଏହି ‘ଏଫ୍ଆଇଆର୍’ ପଞ୍ଜିକୃତ କରାଯାଇଥିଲା।
ସୂଚନାଯୋଗ୍ୟ, ଅନ୍ୟ କେତେକ ସହଯୋଗୀ ଓ ଅଂଶୀଦାରଙ୍କ ସହିତ ସୌରଭ ଚନ୍ଦ୍ରାକର ଓ ରବି ଉପ୍ପଲ ନାମରେ ଦୁଇଜଣ ବ୍ୟକ୍ତି ‘ମହାଦେବ ବେଟିଙ୍ଗ୍ ଆପ୍’ ଚଳାଉ ଥିଲେ।