ଅଧିନାୟକ ହେବା ପାଇଁ ହାର୍ଦ୍ଦିକ-ସୂର୍ଯ୍ୟକୁମାର ମୁହାଁମୁହିଁ: ଗମ୍ଭୀର-ରୋହିତଙ୍କ ପସନ୍ଦ କିଏ ଜାଣନ୍ତୁ…

କୋଲକାତା: ଭାରତ ଏବଂ ଶ୍ରୀଲଙ୍କା ମଧ୍ୟରେ ଟି-୨୦ ସିରିଜ ଜୁଲାଇ ୨୭ରୁ ଆରମ୍ଭ ହେବାକୁ ଯାଉଛି। ଯେଉଁଥିପାଇଁ ଖୁବ ଶୀଘ୍ର ଟିମ୍ ଇଣ୍ଡିଆ ଦଳ ଘୋଷଣା କରାଯିବ। ଟି-୨୦ ଆନ୍ତର୍ଜାତୀୟ କ୍ରିକେଟରୁ ରୋହିତ ଶର୍ମା, ବିରାଟ କୋହଲି ଏବଂ ରବିନ୍ଦ୍ର ଜାଡେଜାଙ୍କ ପରି ବରିଷ୍ଠ ଖେଳାଳିଙ୍କ ଅବସର ପରେ ବର୍ତ୍ତମାନ ଶ୍ରୀଲଙ୍କା ବିପକ୍ଷରେ ଜଣେ ନୂଆ ଅଧିନାୟକ ଏବଂ ନୂଆ ଦଳ ଗଠନ ହେବାକୁ ଯାଉଛି।

ଅନ୍ୟପକ୍ଷରେ, ଟି-୨୦ ଦଳର ଅଧିନାୟକଙ୍କ ସମ୍ପର୍କରେ ଗତ କିଛି ଦିନ ହେବ ଅନେକ ଆଲୋଚନା ଚାଲିଛି। ମିଡିଆ ରିପୋର୍ଟ ଅନୁଯାୟୀ, ଶ୍ରୀଲଙ୍କା ସହିତ ଟି-୨୦ ସିରିଜରେ ହାର୍ଦ୍ଦିକ ପାଣ୍ଡ୍ୟାଙ୍କ ସ୍ଥାନରେ ସୂର୍ଯ୍ୟକୁମାର ଯାଦବ ଅଧିନାୟକ ହୋଇପାରନ୍ତି। ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀର ଏବଂ ଟିମ୍ ଇଣ୍ଡିଆର ଅଧିନାୟକ ରୋହିତ ଶର୍ମା ମଧ୍ୟ ସୂର୍ଯ୍ୟକୁମାର ଯାଦବଙ୍କୁ ଅଧିନାୟକ କରିବାକୁ ଚାହୁଁଛନ୍ତି। ଏହାପୂର୍ବରୁ ମଧ୍ୟ ଏହି ଦୁଇ ଖେଳାଳି ଟି-୨୦ ଇଣ୍ଟରନ୍ୟାସନାଲରେ ଟିମ୍ ଇଣ୍ଡିଆର ଅଧିନାୟକତ୍ୱ କରି ସାରିଛନ୍ତି।

ପ୍ରଥମ ଥର ପାଇଁ ଆଇପିଏଲ୍ ୨୦୨୪ରେ ହାର୍ଦ୍ଦିକ ପାଣ୍ଡ୍ୟାଙ୍କୁ ମୁମ୍ବାଇ ଇଣ୍ଡିଆନ୍ସର ଅଧିନାୟକତ୍ୱ ପ୍ରଦାନ କରାଯାଇଥିଲା ଏବଂ ହାର୍ଦ୍ଦିକ ଏହି ସିଜିନକୁ କେବେ ବି ଭୁଲି ପାରିବେ ନାହିଁ। ଅଧିନାୟକ ଭାବରେ ହାର୍ଦ୍ଦିକଙ୍କ ପାଇଁ ଏହି ସିଜିନ ଅତ୍ୟନ୍ତ ଖରାପ ଥିଲା। ଏହାପୂର୍ବରୁ ହାର୍ଦ୍ଦିକଙ୍କୁ ୨୦୨୨ ମସିହାରେ ପ୍ରଥମ ଥର ପାଇଁ ଗୁଜରାଟ ଟାଇଟାନ୍ସର ଅଧିନାୟକ କରାଯାଇଥିଲା ଏବଂ ପାଣ୍ଡ୍ୟା ତାଙ୍କ ଅଧିନାୟକତ୍ୱରେ ଦଳକୁ ଆଇପିଏଲ ଟାଇଟଲକୁ ନେଇଥିଲେ।