କଠୋର ହେଲେ ପୁଟିନ କହିଲେ ନିସ୍ତାର ଦେବୁ ନାହିଁ
ମସ୍କୋ: ଯାହାର ମୁଣ୍ଡ ଠିକ୍ ଥିବ ସେ ରୁଷ୍ ବିପକ୍ଷରେ ଆଣବିକ ଅସ୍ତ୍ର ପ୍ରୟୋଗ କରିବେ ନାହିଁ; ଯଦି ସେ ଭଳି ଆକ୍ରମଣ କରାଯାଇଥିବା ଜଣାପଡ଼େ, ଆକାଶକୁ ଏତେ ସଂଖ୍ୟକ କ୍ଷେପଣାସ୍ତ୍ର ଛାଡ଼ିବୁ ଯେ, ଜଣେ ହେଲେ ଶତ୍ରୁ ରକ୍ଷା ପାଇବାକୁ ସୁଯୋଗ ପାଇବେ ନାହିଁ ବୋଲି ଗୁରୁବାର ଦିନ ରୁଷୀୟ ରାଷ୍ଟ୍ରପତି ଭ୍ଲାଦିମିର୍ ପୁଟିନ୍ ସତର୍କ କରାଇ ଦେଇଛନ୍ତି।
ବିଶ୍ଳେଷଣକାରୀ ଓ ସାମ୍ବାଦିକମାନଙ୍କର ବାର୍ଷିକ ସମାରୋହରେ ଉଦ୍ବୋଧନ ଦେବା ବେଳେ ପୁଟିନ୍ ସୁନିଶ୍ଚିତ କରି କହିଛନ୍ତି ଯେ, ରୁଷ୍ ତା’ର ନୂଆ ଷ୍ଟ୍ରାଟେଜିକ୍ ମିସାଇଲ୍ ‘ବୁରେଭେସ୍ତନିକ୍’ର ସଫଳ ପରୀକ୍ଷଣ କରିଛି। ଏହି ଆଣବିକ ଶକ୍ତିଚାଳିତ ଓ ଆଣବିକ ଅସ୍ତ୍ରବାହୀ ‘କ୍ରୁଜ୍’ କ୍ଷେପଣାସ୍ତ୍ର ଅନେକ ହଜାର ମାଇଲ୍ ଦୂରକୁ ଗତି କରିପାରିବ।