ଇଣ୍ଡିଆ ମେଣ୍ଟ ଉପରେ ବର୍ଷିଲେ ମୋଦୀ, କହିଲେ ସନାତନ ଧର୍ମକୁ ବିଲୁପ୍ତ କରିବା ମେଳୀ
ନୂଆଦିଲ୍ଲୀ: ‘ଇଣ୍ଡିଆ ବ୍ଲକ୍’ ସନାତନ ଧର୍ମ, ଦେଶର ସଂସ୍କୃତି ଓ ନାଗରିକମାନଙ୍କ ବିପଦ ସୃଷ୍ଟି କରୁଛି ବୋଲି ଆଜି ବିରୋଧୀମାନଙ୍କୁ ତୀବ୍ର ସମାଲୋଚନା କରି ମଧ୍ୟପ୍ରଦେଶରେ ଆୟୋଜିତ ରାଲିରେ ଉଦ୍ବୋଧନ ଦେବା ବେଳେ ପ୍ରଧାନମନ୍ତ୍ରୀ କହିଛନ୍ତି, ସନାତନ ଧର୍ମକୁ ବିଲୁପ୍ତ କରି ସେମାନେ ଦେଶକୁ ୧୦୦୦ ବର୍ଷ ତଳର ଦାସତ୍ବ ଆଡ଼କୁ ଫେରାଇ ନେବାକୁ ଚାହୁଁଛନ୍ତି।।
ରାଲିରେ ଉଦ୍ବୋଧନ ଦେବା ବେଳ ପ୍ରଧାନମନ୍ତ୍ରୀ କହିଲେ, ଅହଙ୍କାରୀ ମେଣ୍ଟ ‘ସନାତନ ଧର୍ମ’ ନଷ୍ଟ କରିଦେବାକୁ ଚାହାଁନ୍ତି। ଅଳ୍ପ କେତେକ ସଂଗଠନ ଦେଶ ଓ ସମାଜକୁ ଭାଗ କରିବାକୁ ଉଦ୍ୟମ କରୁଛନ୍ତି। ସେମାନେ ‘ଇଣ୍ଡିଆ ବ୍ଲକ୍’ରେ ଏକତ୍ର ହୋଇଛନ୍ତି। ଭାରତୀୟ ସଂସ୍କୃତି ଉପରେ ଆକ୍ରମଣ କରିବା ପାଇଁ ମଧ୍ୟ ସେମାନେ ଗୁପ୍ତ ଯୋଜନା କରିଛନ୍ତି। ସନାତନ ସଂସ୍କୃତି ବିଲୋପ କରିବା ଲାଗି ‘ଇଣ୍ଡଆ ବ୍ଲକ୍’ ପ୍ରତିବଦ୍ଧ ହୋଇଛି।
ସେ ଆହୁରି ମଧ୍ୟ କହିଛନ୍ତି, ସନାତନ ଧର୍ମ ଅନେକଙ୍କ ପାଇଁ ପ୍ରେରଣାର ଉତ୍ସ ହୋଇ ଆସିଛି। ସନାତନ ଧର୍ମକୁ ବିଲୋପ କରିବାର ଆହ୍ବାନ ସମସ୍ତ ସୀମା ଅତିକ୍ରମ କରିଯାଇଛି। ଏହି ଆହ୍ବାନକୁ ଚାଲେଞ୍ଜ୍ ନ କରି ଛଡ଼ାଯିବ ନାହିଁ। ଆଜି ସେମାନେ ଅବାଧରେ ସନାତନ ଧର୍ମକୁ ସମାଲୋଚନା କଲେ। ଆସନ୍ତାକାଲି ଆମକୁ ଆହୁରି ବେଶୀ ସମାଲୋଚନା କରିବେ। ଦେଶର ସମସ୍ତ ସନାତନୀ ଓ ଦେଶକୁ ଶ୍ରଦ୍ଧା କରୁଥିବା ଲୋକମାନଙ୍କୁ ସଜାଗ ରହିବାକୁ ପଡ଼ିବ। ଆମେ ଏଭଳି ଲୋକଙ୍କୁ ବାଧା ଦେବା ଉଚିତ।