*ମୁନ୍ ଟିଭି ମୁଭିଜ୍ ନିବେଦିତ ଓଡିଆ ଫିଲ୍ମ ‘ଲଭ୍ ଇମ୍ପସିବଲ୍’ ଶୁଭମୁକ୍ତି ଜୁଲାଇ ୨୮ରେ*
ଭୁବନେଶ୍ୱର:ଚଳିତ ମାସ ଜୁଲାଇ ୨୮ ତାରିଖ ଶୁକ୍ରବାର ଦିନ ଓଡିଶାର ୧୦ଟି ସିନେମା ହଲ୍ ରେ ରିଲିଜ୍ ହେବାକୁ ଯାଉଛି ମୁନ୍ ଟିଭି ମୁଭିଜ୍ ନିବେଦିତ ଓଡିଆ ଫିଲ୍ମ ‘ଲଭ୍ ଇମ୍ପସିବଲ୍’ l ପୂର୍ବରୁ ଓଡ଼ିଆ ଦର୍ଶକଙ୍କୁ ‘ସୁନ୍ଦରଗଡ଼ ର ସଲମନ ଖାନ୍’, ‘ଝିଅଟା ବିଗିଡି ଗଲା’ ଭଳି ଅନେକ ସୁପରହିଟ୍ ଚଳଚ୍ଚିତ୍ର ଦେଇଥିବା ପ୍ରଯୋଜକ ସଚ୍ଚିକାନ୍ତ ଜେନା ଏହି “ଲଭ ଇମ୍ପସିବଲ” ଚଳଚ୍ଚିତ୍ର ମଧ୍ୟ ପ୍ରଯୋଜନା କରିଛନ୍ତି l ଫିଲ୍ମର ଗୀତଗୁଡିକ ପୂର୍ବରୁ ଭୁବନେଶ୍ବର ସ୍ଥିତ ଏକ ଘରୋଇ ହୋଟେଲରେ ରିଲିଜ ହୋଇଥିଲା l ଲୋକପ୍ରିୟ ସଙ୍ଗୀତ ନିର୍ଦ୍ଦେଶକ ବୈଦ୍ୟନାଥ ଦାଶ ନିର୍ଦ୍ଦେଶିତ ଗୀତ ଗୁଡିକ ଦର୍ଶକଙ୍କ ମନକୁ ଛୁଇଁବାରେ ସକ୍ଷମ ହୋଇଛି l
ଏକ ତ୍ରିକୋଣୀୟ ପ୍ରେମରୁ ଆରମ୍ଭ କାହାଣୀର ଶେଷ କିପରି ରହସ୍ୟମୟ ହୋଇଛି ତାହା ଏହି ଫିଲ୍ମର ମୂଳ ବିଷୟବସ୍ତୁ ବୋଲି କହିଛନ୍ତି ଫିଲ୍ମର ନିର୍ଦ୍ଦେଶକ ତ୍ରିପତି ସାହୁ l ଯୁବପିଢି ନିଶ୍ଚିତ ଏହି କାହାଣୀକୁ ଭଲପାଇବା ଦେବେ ବୋଲି କହିଛନ୍ତି ତ୍ରିପତି l ତେବେ ମୌଳିକ କାହାଣୀ ଠାରୁ ଭିନ୍ନ ଓ ପାରିବାରିକ ବିଷୟବସ୍ତୁ ମଧ୍ୟ ଏହି ଫିଲ୍ମର ଅବିଚ୍ଛେଦ ଅଙ୍ଗ ବୋଲି କହିଛନ୍ତି ଫିଲ୍ମର ପ୍ରଯୋଜକ ସଚ୍ଚିକାନ୍ତ ଜେନା l ଫିଲ୍ମର କାହାଣୀ ଓ ସଂଳାପ ଲେଖିଛନ୍ତି ପୁରୁଖା ଲେଖକ ଡଃ. ରଜନୀ ରଞ୍ଜନ l
ଏହି ଫିଲ୍ମରେ ଦର୍ଶକ ଦେଖିବେ ଓଡ଼ିଶାର ଲୋକପ୍ରିୟ ଅଭିନେତା ସ୍ବର୍ଗତ ପିଣ୍ଟୁ ନନ୍ଦଙ୍କ ଏକ ଚମତ୍କାର ଭୂମିକା l ମୁଖ୍ୟ ଭୂମିକା ରେ ରୋହନ୍ ଗର୍ଗ (ଯିଏ କି ବଲାଙ୍ଗୀରରୁ ସୁଦୂର ମୁମ୍ବାଇର ଏକତା କପୁର ଇନଷ୍ଟିଟ୍ୟୁଟ ରୁ ଉତ୍ତୀର୍ଣ୍ଣ ହୋଇ ଓଡ଼ିଆ ଫିଲ୍ମ ଇଣ୍ଡଷ୍ଟ୍ରି ରେ ପାଦ ଦେଇଛନ୍ତି), ଅଭିନେତ୍ରୀ ପୁନମ୍ ମିଶ୍ର ଓ ଅଳକା ଶତପଥୀ ଥିବା ବେଳେ ଅନ୍ୟାନ୍ୟ ଭୂମିକା ରେ ଅଛନ୍ତି ପ୍ରତିଭା ପଣ୍ଡା, କୁସୁମ ତ୍ରିପାଠୀ, ପ୍ରମୋଦ ରାଉତ, ରୋଶନ ଭରଦ୍ବାଜ, ବିଶ୍ଵଜିତ୍, ନନ୍ଦିନୀ ଓ ଶିଶୁ କଳାକାର ଭାବରେ ଆୟେଶା ଏବଂ ତାପସ ଚମତ୍କାର ଅଭିନୟ କରିଛନ୍ତି l
ଫିଲ୍ମର ଗୀତ ଲେଖିଛନ୍ତି ଡ.ନିର୍ମଳ ନାୟକ ଓ ଡ. ଶୁଭ ଦାଶ | କଣ୍ଠଦାନ କରିଛନ୍ତି ହ୍ୟୁମାନ୍ ସାଗର, ଅସୀମା ପଣ୍ଡା, ସତ୍ୟଜିତ୍, ଅର୍ପିତା ଚୌଧୁରୀ, ତାରିକ୍ ଅଜିଜ୍ ଓ ସମ୍ବଲପୁରୀ ଲୋକ ଗୀତ ର ହିଟ୍ ସିଙ୍ଗର ଉମା l ଫିଲ୍ମର ନୃତ୍ୟ ନିର୍ଦ୍ଦେଶକ ଭାବରେ ସୁଧାକର ବସନ୍ତ ଓ ତ୍ରିପତି ସାହୁ ଦାୟିତ୍ୱ ନେଇଥିବା ବେଳେ ଫିଲ୍ମର ସହକାରୀ ନିର୍ଦ୍ଦେଶକ ସୁଧାଂଶୁ ଓ ସତ୍ୟ ରହିଛନ୍ତି l ପୋଷ୍ଟ ପ୍ରଡକସନ୍ସ କାମ ମୁନ୍ ଟିଭି ଷ୍ଟୁଡିଓ ନିଜେ କରିଛି l ଫିଲ୍ମଟି ନିଶ୍ଚୟ ଓଡିଆ ଦର୍ଶକଙ୍କ ମନକୁ ଛୁଇଁବ ବୋଲି ଆଶାବ୍ୟକ୍ତ କରିଛନ୍ତି ଫିଲ୍ମର ପ୍ରଚାର ଓ ପ୍ରସାର ଦାୟିତ୍ଵରେ ଥିବା ମିଡିଆ ପ୍ଲାନର୍ ଓ କ୍ରି୍ଏଟିଭ ମୁଖ୍ୟ ପ୍ରଣୟ ଜେଠୀ l