ଭାରତର ରାଜନୈତିକ ଇତିହାସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏକ ନୂଆ ମାଇଲଖୁଣ୍ଟ ସ୍ଥାପନ କରିଛନ୍ତି। ସେ ଭାରତର ସବୁଠୁ ଲମ୍ବା ସମୟ ଧରି ‘ଶାସନ ମୁଖ୍ୟ’ ଭାବେ କାର୍ଯ୍ୟ କରିବାର ରେକର୍ଡ ନିଜ ନାମରେ କରିଛନ୍ତି। ଏକ୍ଷେତ୍ରରେ ମୋଦୀ ଆଜି ସିକିମର ପୂର୍ବତନ ମୁଖ୍ୟମନ୍ତ୍ରୀ ପୱନ କୁମାର ଚାମଲିଂଙ୍କୁ ପଛରେ ପକାଇ ଦେଇଛନ୍ତି । ଚାମିଲିଂ ୮ ହଜାର ୯୩୦ ଦିନ ସିକିମ ମୁଖ୍ୟମନ୍ତ୍ରୀ ଭାବେ କାର୍ଯ୍ୟ କରିଥିଲେ। ମୋଦୀ ଆଜି ଶାସନ ମୁଖ୍ୟ ଭାବେ ୮ ହଜାର ୯୩୧ ଦିନ ପୂରଣ କରିଛନ୍ତି। ଏଥିରେ ଗୁଜରାଟ ମୁଖ୍ୟମନ୍ତ୍ରୀ ଓ ଦେଶର ପ୍ରଧାନମନ୍ତ୍ରୀ ଭାବେ ମୋଦୀଙ୍କ କାର୍ଯ୍ୟକାଳ ସାମିଲ ଅଛି। ମୋଦୀ ୨୦୦୧ରେ ଗୁଜରାଟ ମୁଖ୍ୟମନ୍ତ୍ରୀ ହୋଇଥିଲେ ଓ ୨୦୧୪ରେ ପ୍ରଧାନମନ୍ତ୍ରୀ ହେବା ପର୍ୟ୍ୟନ୍ତ ମୁଖ୍ୟମନ୍ତ୍ରୀ ଥିଲେ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୧୭ ସେପ୍ଟେମ୍ବର ୧୯୫୦ ରେ ଗୁଜୁରାଟର ଭାଡନଗରରେ ଜନ୍ମଗ୍ରହଣ କରିଥିଲେ। ସେ ରାଷ୍ଟ୍ରୀୟ ସ୍ୱୟଂସେବକ ସଂଘ (RSS)ର ପ୍ରଚାରକ ଭାବରେ ତାଙ୍କର ରାଜନୈତିକ ଜୀବନ ଆରମ୍ଭ କରିଥିଲେ। ସେ ୧୯୮୫ ମସିହାରେ ବିଜେପିରେ ଯୋଗ ଦେଇଥିଲେ ଏବଂ ଦଳୀୟ ସାଂଗଠନିକ କାର୍ଯ୍ୟକଳାପରେ ସକ୍ରିୟ ଭାବରେ ଯୋଗଦାନ ଦେଇଥିଲେ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୨୦୦୧ ମସିହାରେ ଗୁଜରାଟର ମୁଖ୍ୟମନ୍ତ୍ରୀ ଭାବରେ ତାଙ୍କର କ୍ୟାରିଅର ଆରମ୍ଭ କରିଥିଲେ। ସେ ୨୦୧୪ ମସିହାରୁ ପ୍ରଧାନମନ୍ତ୍ରୀ ଭାବରେ କାର୍ଯ୍ୟ କରିଛନ୍ତି। ଏହି ସମୟ ମଧ୍ୟରେ, ସେ ୨୦୧୪, ୨୦୧୯ ଏବଂ ୨୦୨୪ ମସିହାରେ ଲଗାତାର ତିନୋଟି ନିର୍ବାଚନରେ ବିଜୟୀ ହୋଇ ସରକାରର ନେତୃତ୍ୱ ନେଇଛନ୍ତି। ମୋଦୀ ଏବେ ଭାରତରେ ସବୁଠାରୁ ଅଧିକ ସମୟ ପାଇଁ ନିର୍ବାଚିତ ନେତା ହୋଇସାରିଛନ୍ତି।
ନରେନ୍ଦ୍ର ମୋଦି ଅକ୍ଟୋବର ୭, ୨୦୦୧ ରେ ଗୁଜରାଟର ମୁଖ୍ୟମନ୍ତ୍ରୀ ଭାବରେ କାର୍ଯ୍ୟଭାର ଗ୍ରହଣ କରିଥିଲେ। ସେ ୨୧ ମଇ ୨୦୧୪ ପର୍ଯ୍ୟନ୍ତ ଏହି ପଦବୀରେ ରହିଥିଲେ, ୧୩ ବର୍ଷରୁ ଅଧିକ ସମୟ ପାଇଁ ମୁଖ୍ୟମନ୍ତ୍ରୀ ଭାବରେ କାର୍ଯ୍ୟ କରିଥିଲେ। ତା’ପରେ ସେ ୨୬ ମଇ ୨୦୧୪ ରେ ପ୍ରଧାନମନ୍ତ୍ରୀ ଭାବରେ ଶପଥ ଗ୍ରହଣ କରିଥିଲେ। ସେବେଠାରୁ, ସେ ୨୦୧୪, ୨୦୧୯ ଏବଂ ୨୦୨୪ ରେ ଲଗାତାର ତିନୋଟି ଲୋକସଭା ନିର୍ବାଚନ ମାଧ୍ୟମରେ ଜାତୀୟ ଗଣତାନ୍ତ୍ରିକ ମେଣ୍ଟ (NDA) ସରକାରର ନେତୃତ୍ୱ ନେଇଛନ୍ତି।
ମୋଦି ହେଉଛନ୍ତି ଗୁଜରାଟର ସବୁଠାରୁ ଅଧିକ ସମୟ ପାଇଁ ମୁଖ୍ୟମନ୍ତ୍ରୀ ଏବଂ ଯେକୌଣସି ରାଜ୍ୟର ମୁଖ୍ୟମନ୍ତ୍ରୀ ଭାବରେ ସର୍ବାଧିକ ଅଭିଜ୍ଞତା ଥିବା ପ୍ରଧାନମନ୍ତ୍ରୀ।
ଏହି ଅବସରରେ ମୁଖ୍ୟମନ୍ତ୍ରୀ ମୋହନ ମାଝୀ କହିଛନ୍ତି ଭାରତର ଜନସେବା ପରମ୍ପରାରେ ଏକ ଅଦ୍ୱିତୀୟ ଏବଂ ଗୌରବପୂର୍ଣ୍ଣ ଅଧ୍ୟାୟ.. ଆଜି, ଆଦରଣୀୟ ଶ୍ରୀ ନରେନ୍ଦ୍ର ମୋଦି ଜୀ ଦେଶର ସବୁଠାରୁ ଦୀର୍ଘକାଳ ସେବା ପ୍ରଦାନ କରିଥିବା ଶାସନ ପ୍ରମୁଖ ଭାବେ ଏକ ଐତିହାସିକ କୀର୍ତ୍ତିମାନ ସ୍ଥାପନ କରିଛନ୍ତି.. ଗୁଜରାଟର ମୁଖ୍ୟମନ୍ତ୍ରୀ ପଦରୁ ଭାରତର ପ୍ରଧାନମନ୍ତ୍ରୀ ପର୍ଯ୍ୟନ୍ତ ତାଙ୍କର ୮,୯୩୧ ଦିନର ନିରନ୍ତର ଜନସେବା, ‘ରାଷ୍ଟ୍ର ପ୍ରଥମ’ର ଅଟଳ ସଂକଳ୍ପ, ନିର୍ଣ୍ଣାୟକ ନେତୃତ୍ୱ ଏବଂ ନିଷ୍କଳଙ୍କ କାର୍ଯ୍ୟଶୈଳୀର ସବଳ ପ୍ରମାଣ ।