ଦର୍ଶକଙ୍କ ମନ ଜିତିଲା ‘ପ୍ରସ୍ଥାନମ୍’

ଭୁବନେଶ୍ବର ( ୧୬/୧୨) : ଅନେକ ଦିନ ପରେ ଓଲିଉଡର ମାହୋଲ ଏବେ ଚଳଚଞ୍ଚଳ । ଗୋଟିଏ ପରେ ଗୋଟିଏ ଚଳଚ୍ଚିତ୍ର ରିଲିଜ ହେବାରେ ଲାଗିଛି। ରିଲିଜର ଏହି ସରଗରମ ଭିତରେ ବହୁ ପ୍ରତୀକ୍ଷିତ ଓଡ଼ିଆ ଚଳଚ୍ଚିତ୍ର ‘ପ୍ରସ୍ଥାନମ୍’ ମୁକ୍ତିଲାଭ କରିଛି । ରେନଡ୍ରପ୍ ପିକଚର ଓ ଏସ୍ଏସ୍ କ୍ରିଏଟିଭ ଫିଲ୍ମର ମିଳିତ ସହଯୋଗରେ ନିର୍ମିତ ଏହି ଚଳଚ୍ଚିତ୍ରରେ ଅମ୍ଲାନ ଓ ଶ୍ରଦ୍ଧା ମୁଖ୍ୟ ଭୂମିକାରେ ଅଭିନୟ କରିଛନ୍ତି। ତାଙ୍କ ସହ ସ୍ୱର୍ଗତଃ ମିହିର ଦାସ, ଉଷସୀ ମିଶ୍ର, ମନୋଜ ମିଶ୍ର, ବାପି, ବଣ୍ଟି, ଅମୀର ଓ ରାଜସ୍ମିତା କର ପ୍ରମୁଖ ଅଭିନୟ କରିଛନ୍ତି।

ଏହି ଚଳଚ୍ଚିତ୍ରଟି ଓଡ଼ିଶାର ୩୦ ଟି ହଲରେ ଏକା ସାଙ୍ଗରେ ମୁକ୍ତିଲାଭ କରିଥିବା ବେଳେ ଭୁବନେଶ୍ଵର ସିନେପଲିସରେ ଏହାର୍ ପ୍ରିମିୟର ଶୋ ଅନୁଷ୍ଠିତ ହୋଇଯାଇଛି। ରାଜା ଡିଙ୍କ ନିର୍ଦ୍ଦେଶନାରେ ସମ୍ପୂର୍ଣ୍ଣ ନୂଆ କାହାଣୀ ନେଇ ନିର୍ମିତ ଏହି ଚଳଚ୍ଚିତ୍ରର ନିର୍ମାଣରେ ଡି ଫିଲ୍ମ ସହିତ ସୃଜନ ଫିଲ୍ମ ସହୋଯାଗ କରିଛନ୍ତି। ରିଙ୍କୁ ରିନୁ ଜେନା ଓ ଦେବେଶ ଚନ୍ଦ୍ର ଦାସଙ୍କ ପ୍ରଯୋଜନା, ସୁଶୀଲ ବାରିକଙ୍କ ସହ ପ୍ରଯୋଜନା ଓ ଦୀପକ କୁମାରଙ୍କ ଲାଇନ ପ୍ରଯୋଜନାରେ ନିର୍ମିତ ଏହି ଚଳଚ୍ଚିତ୍ରର ଚିତ୍ର ଉତ୍ତୋଳନ ଅକ୍ଷୟ କୁମାର ନାୟକ, ସମ୍ପାଦନା ରଞ୍ଜନ ଖଟେଇ, ସଙ୍ଗୀତ ନିର୍ଦ୍ଦେଶନା ଆସାଦ୍ ନିଜାମ, ସଂଳାପ ମାନସ ପଢ଼ିହାରୀ ଏବଂ କାହାଣୀ ଓ ଚିତ୍ରନାଟ୍ୟ କୁମାରଶ୍ରୀ ସାହୁ ପ୍ରସ୍ତୁତ କରିଛନ୍ତି।

ଅଭିନେତା ଅଭିନେତ୍ରୀଙ୍କ ବଳିଷ୍ଠ ଅଭିନୟ ସହ ଚଳଚ୍ଚିତ୍ରର କାହାଣୀର ଗତିଶୀଳତା ପ୍ରଶଂସା ସାଉଁଟିବା ସହ ଦର୍ଶକଙ୍କ ହୃଦୟ ଛୁଇଁବ ବୋଲି ମିଡିଆ ପ୍ଳାନର ପ୍ରଣୟ ଜେଠୀ ସୂଚନା ଦେଇଛନ୍ତି।