ମୁମ୍ବାଇ (ଆମ ଟିଭି): ଇଡି କବ୍ଚାରେ ସଞ୍ଜୟ ରାଉତ । ଶିବସେନା ସାଂସଦ ସଞ୍ଜୟ ରାଉତ ଅଟକ । ସଞ୍ଜୟ ରାଉତଙ୍କୁ ହେପାଜତକୁ ନେଲା ଇଡି । ପାତ୍ରା ଚୌଲ ସ୍କାମରେ ଆଜି ସକାଳୁ ସଞ୍ଜୟଙ୍କ ଘରେ ପହଞ୍ଚିଥିଲା ଇଡିର ୧୨ ଜଣିଆ ଟିମ୍ । ଚଢ଼ାଉ ସହ ସଞ୍ଜୟଙ୍କୁ ପଚରାଉଚରା ମଧ୍ୟ କରିଥିଲା ଟିମ୍ । ପଚରାଉଚରା ପରେ ସଞ୍ଜୟଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ ଅଟକ ରଖିଛି । ଏକ ହଜାର ୩୪ କୋଟି ପାତ୍ର ଚୌଲ୍ ଲ୍ୟାଣ୍ଡ ସ୍କାମରେ ସଞ୍ଜୟ ରାଉତଙ୍କ ନାଁ ଆସିବା ପରେ ତାଙ୍କୁ ସମନ କରିଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ ।
ପୂର୍ବରୁ ଇଡି ଅଫିସରେ ସଞ୍ଜୟ ରାଉତଙ୍କୁ ଜେରା କରିଥିଲା । ସୂଚନାଥାଉକି, ରବିବାର ସକାଳେ ପ୍ରବର୍ତ୍ତନ ନିର୍ଦ୍ଦେଶାଳୟ ପତ୍ରା ଚୌଲ ଦୁର୍ନୀତି ମନି ଲଣ୍ଡରିଂ ମାମଲାରେ ସଞ୍ଜୟ ରାଉତଙ୍କ ଘରେ ପହଞ୍ଚିଥିଲା । ସକାଳ ୭ଟାରେ ଇଡି ରାଉତଙ୍କ ଭାଣ୍ଡୁପ ସ୍ଥିତ ଘରେ ପହଞ୍ଚିଥିଲା । ପାଖାପାଖି ୯ ଘଣ୍ଟାର ଛାନଭିନ ଓ ପଚରା ଉଚରା ପରେ ଏବେ ସଞ୍ଜୟଙ୍କୁ ହେପାଜତକୁ ନେଇଛି ଇଡି । ରେଡ୍ ସମୟରେ ସଞ୍ଜୟ ରାଉତ କହିଥିଲେ ମତେ ଜେତେ ଡରେଇଲେ ମଧ୍ୟ ମୁଁ ମୁଣ୍ଡ ନୁଆଁଇବି ନାହିଁ । ଶିବସେନାରେ ଥିଲି ଶିବସେନାରେ ରହିବି । ତେବେ ଇଡି ଆଗକୁ ଆହରି ଶିବସେନା ନେତାଙ୍କ ଘର ଉପରେ ଚଢାଉ କରିପାରେ ବୋଲି ସୂଚନା ମିଳୁଛି ।