ଆସନ୍ତା ଜାନୁଆରୀ ୨୦୨୩ ରେ ମୁକ୍ତିଲାଭ କରିବ ‘ତୋର ମୋର କଟି’

ଭୁବନେଶ୍ୱର (ଆମ ଟିଭି): ନୂଆ କାହାଣୀ ଓ ଭରପୁର ମନୋରଞ୍ଜନ ସହ ‘ଝିଲିକ ମୋସନ୍ ପିକ୍ଚର୍ସ’ର ତୃତୀୟ ଅବଦାନ “ତୋର ମୋର କଟି” ଆସନ୍ତା ଜାନୁଆରୀ ୨୦୨୩ ରେ ମୁକ୍ତିଲାଭ କରିବ ବୋଲି ଏହି ଚଳଚ୍ଚିତ୍ରର ପ୍ରଚାର ପ୍ରସାର ଦାୟିତ୍ୱରେ ଥିବା ମିଡ଼ିଆ ପ୍ଲାନର ତଥା କ୍ରିଏଟିଭ ହେଡ ପ୍ରଣୟ ଜେଠୀ ସୂଚନା ଦେଇଛନ୍ତି । ପୂର୍ବରୁ ଏହି ଚଳଚ୍ଚିତ୍ରର ଅଡିଓ ରିଲିଜ ହୋଇ ଆମର ମ୍ୟୁଜିକ ୟୁଟ୍ୟୁବ ଚ୍ୟାନେଲ୍ ମାଧ୍ୟମରେ ଲୋକଙ୍କ ଦ୍ୱାରା ବହୁଳ ଭାବରେ ଆଦୃତ ହୋଇସାରିଛି ।

ଅଭିନେତ୍ରୀ ରୁ ପ୍ରଯୋଜିକା ସାଜିଥିବା ଝିଲିକ ଭଟ୍ଟାଚାର୍ୟ୍ୟଙ୍କ ପ୍ରଯୋଜନାରେ ଯୁବ ନିର୍ଦ୍ଦେଶକ ରମେଶ ରାଉତଙ୍କ ନିର୍ଦ୍ଦେଶନାରେ ନବାଗତ ଶୈଳେନ୍ଦ୍ର ଓ ଶୀତଲଙ୍କ ସହ ଏହି ଚଳଚ୍ଚିତ୍ରରେ ସିଦ୍ଧାନ୍ତ ମହାପାତ୍ର, ପ୍ରଦ୍ୟୁମ୍ନ ଲେଙ୍କା, ସୁଧାଂଶୁ ମୋହନ ସାହୁ, ସଞ୍ଜୟ ନାୟକ (ଟୁଟୁ ), ବବି ମିଶ୍ର, ସୁଦୀପ୍ତ, ଟୁକୁନା ଷ୍ଟାଇଲିଷ୍ଟ, କାଳିଆ ଷଣ୍ଢ, ଐଶ୍ଵରୀୟା, ରୁପସା, କଟପ୍ପା, ଦେବିକା ପ୍ରମୁଖ ଅଭିନୟ କରିଛନ୍ତି । ଏହି ଚଳଚ୍ଚିତ୍ର ପାଇଁ ଦୀପକ ଜେନା ସଂଳାପ ଲେଖିଛନ୍ତି । ଗୀତିକାର ନିର୍ମଳ ନାୟକ ଓ ଅରୁଣ ମନ୍ତ୍ରୀଙ୍କ ଗୀତକୁ ପ୍ରେମ ଆନନ୍ଦଙ୍କ ସଙ୍ଗୀତ ନିର୍ଦ୍ଦେଶନାରେ ହ୍ୟୁମାନ ସାଗର, ଦିପ୍ତୀରେଖା ପାଢ଼ୀ, ସବିଶେଷ, ଆଶୁତୋଷ, ଅନନ୍ୟା ଶ୍ରୀତମ ନନ୍ଦ ଓ ଦେବକୃପା ଏହି ଚଳଚ୍ଚିତ୍ର ପାଇଁ କଣ୍ଠଦାନ କରିଛନ୍ତି । ଚିତ୍ରତ୍ତୋଳନ ଈଶ୍ୱର ବାରିକ, ପଙ୍କଜ ସିଲ ନୃତ୍ୟ ନିର୍ଦ୍ଦେଶନା ଓ ଶୈଳେନ୍ଦ୍ର ପରିଡା ଫାଇଟ ନିର୍ଦ୍ଦେଶନା ଦେଇଛନ୍ତି ।

‘ଝିଲିକ ମୋସନ୍ ପିକ୍ଚର୍ସ’ ବ୍ୟାନରରେ ନିର୍ମିତ “କିସମିସ” ଓ “ରୁଦ୍ରାଣୀ” ପରି ସଫଳ ଯେପରି ଦର୍ଶକଙ୍କୁ ବାନ୍ଧି ରଖିଥିଲା ଠିକ ସେହିପରି ଏହି ଚଳଚ୍ଚିତ୍ରଟି ମଧ୍ୟ ବହୁଳ ଭାବରେ ଆଦୃତ ହେବ ବୋଲି ନିର୍ଦ୍ଦେଶକ ଶ୍ରୀ ରାଉତ କହିଛନ୍ତି ।