ପ୍ରଧାନମନ୍ତ୍ରୀଙ୍କୁ ଭେଟିଲେ ଯୋଗୀ; ୟୁପିରେ ବଡ଼ ପରିବର୍ତ୍ତନ ନେଇ ଚର୍ଚ୍ଚା ଜୋର୍

ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଆଜି ଦିଲ୍ଲୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ତାଙ୍କ ବାସଭବନରେ ସାକ୍ଷାତ କରିଛନ୍ତି । ଯଦିଓ ଏହାକୁ ଏକ ସୌଜନ୍ୟମୂଳକ ସାକ୍ଷାତ ବୋଲି କୁହାଯାଉଛି, କିନ୍ତୁ ଏହି ଆଲୋଚନା ପରେ ରାଜ୍ୟର ଶାସନ ଓ ପ୍ରଶାସନରେ ଏକ ବଡ଼ ଧରଣର ଅଦଳବଦଳ ହେବା ନେଇ ରାଜନୈତିକ ମହଲରେ କଳ୍ପନାଜଳ୍ପନା ତୀବ୍ର ହୋଇଛି ।

ସୂଚନା ଅନୁସାରେ , ପ୍ରାୟ ଏକ ଘଣ୍ଟା ଧରି ଚାଲିଥିବା ଏହି ଆଲୋଚନାରେ ରାଜ୍ୟର ସାମ୍ପ୍ରତିକ ରାଜନୈତିକ ପରିସ୍ଥିତି, ନିର୍ବାଚନ ଫଳାଫଳର ସମୀକ୍ଷା ଏବଂ ଭବିଷ୍ୟତର ରଣନୀତି ଉପରେ ବିସ୍ତୃତ ଆଲୋଚନା ହୋଇଥିଲା । ଉତ୍ତର ପ୍ରଦେଶରେ ବିଜେପି ଆଶାଠାରୁ ଯଥେଷ୍ଟ କମ୍ ଆସନ ପାଇଥିବାରୁ ଏହାର କାରଣ ଖୋଜିବା ସହ ସରକାର ଓ ସଙ୍ଗଠନ ମଧ୍ୟରେ ଥିବା ସମନ୍ୱୟର ଅଭାବକୁ ନେଇ ମଧ୍ୟ ଚିନ୍ତା ପ୍ରକଟ କରାଯାଇଥିଲା ।
ଏହି ଆଲୋଚନା ପରେ ଯୋଗୀ ସରକାରରେ ଏକ ବଡ଼ ପରିବର୍ତ୍ତନ ଦେଖିବାକୁ ମିଳିପାରେ ବୋଲି ସାଧାରଣରେ ଚର୍ଚ୍ଚା ହେଉଛି । ଖରାପ ପ୍ରଦର୍ଶନ କରିଥିବା କିଛି ମନ୍ତ୍ରୀଙ୍କୁ ମନ୍ତ୍ରିମଣ୍ଡଳରୁ ବାଦ୍ ଦିଆଯାଇପାରେ ଏବଂ କିଛି ନୂଆ ଚେହେରାଙ୍କୁ ସୁଯୋଗ ମିଳିପାରେ । ଏହା ବ୍ୟତୀତ, ପ୍ରାଶାସନିକ ସ୍ତରରେ ମଧ୍ୟ ଏକ ବଡ଼ ଧରଣର ଅଦଳବଦଳର ସମ୍ଭାବନା ରହିଛି । ଲୋକଙ୍କ ନିକଟରେ ସରକାରୀ ଯୋଜନା ପହଞ୍ଚାଇବାରେ ବିଫଳ ହୋଇଥିବା ଅଧିକାରୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରେ ।

ଆଗକୁ ରାଜ୍ୟରେ ୧୦ଟି ବିଧାନସଭା ଆସନ ପାଇଁ ଉପ-ନିର୍ବାଚନ ହେବାକୁ ଯାଉଛି । ତେଣୁ ହୃତଗୌରବ ଫେରି ପାଇବା ପାଇଁ ଦଳ ଏକ ନୂତନ ରଣନୀତି ସହ ଆଗକୁ ବଢିବାକୁ ଚାହୁଛି । ମୋଦୀ ଓ ଯୋଗୀଙ୍କ ଏହି ବୈଠକକୁ ସେହି ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବେ ବିବେଚନା କରାଯାଉଛି ।