ଆମର ଆଉ ରାଜ୍ୟପାଳ ଆବଶ୍ୟକ ନାହିଁ: ପଶ୍ଚିମବଙ୍ଗ ମନ୍ତ୍ରୀ

କୋଲକାତା(ଆମ ଟିଭି): ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଅନେକ ସମୟରେ ପୂର୍ବତନ ରାଜ୍ୟପାଳ ଜଗଦୀପ ଧନଖଡ଼ଙ୍କ କାର୍ଯ୍ୟଶୈଳୀକୁ ନେଇ ପ୍ରଶ୍ନ ଉଠାଇଥିବାବେଳେ ଧନଖଡ଼ ମଧ୍ୟ ମମତା ସରକାରର ଦୋଷ ତ୍ରୁଟି ବାବଦରେ ଖୁଲମଖୁଲା କହିଆସିଛନ୍ତି | ଏପରିକି ବିଶ୍ୱବିଦ୍ୟାଳୟର କୁଳପତି ପଦବୀକୁ ନେଇ ଉଭୟଙ୍କ ମଧ୍ୟରେ ବିବାଦ ଏତେ ବଢିଯାଇଥିଲା ଯେ ମମତା ସରକାରଙ୍କ ତରଫରୁ ରାଜ୍ୟପାଳଙ୍କ ବିରୋଧରେ ବିଧାନସଭାରେ ଏକ ସଂକଳ୍ପ ମଧ୍ୟ ଅଣାଯାଇଥିଲା।

ବର୍ତ୍ତମାନ ଜଗଦୀପ ଧନଖଡ଼ ଉପରାଷ୍ଟ୍ରପତି ଭାବରେ ମନୋନୀତ ହୋଇଥିବାବେଳେ ମଣିପୁର ରାଜ୍ୟପାଳ ଏଲ ଗଣେଶନଙ୍କୁ ପଶ୍ଚିମବଙ୍ଗର ରାଜ୍ୟପାଳ ଭାବେ ଅତିରିକ୍ତ ଦାୟିତ୍ୱ ଦିଆଯାଇଛି। ଏହି ସମୟରେ ମମତା ସରକାରର ମନ୍ତ୍ରୀ ଶୋଭନଦେବ ଚାଟାର୍ଜୀଙ୍କ ଏକ ବିବୃତ୍ତି ସାମ୍ନାକୁ ଆସିଛି, ଯେଉଁଥିରେ ସେ ରାଜ୍ୟପାଳ ପଦକୁ ସମାପ୍ତ କରିବାକୁ ଚାହୁଁଛନ୍ତି। ଶୋଭନଦେବ ଚାଟାର୍ଜୀ କହିଛନ୍ତି, ମୁଁ ଭାବୁଛି ରାଜ୍ୟର ମୁଖ୍ୟ ବିଚାରପତି ରାଜ୍ୟପାଳଙ୍କ ଦାୟିତ୍ୱ ଗ୍ରହଣ କରିବା ଉଚିତ୍ | ମୁଖ୍ୟ ବିଚାରପତି ଆଇନର ସେହି ଦିଗଗୁଡ଼ିକୁ ସମ୍ଭାଳି ପାରିବେ, ଯାହା ରାଜ୍ୟପାଳ କରନ୍ତି। ସେ ଆହୁରି କହିଛନ୍ତି, ମୁଁ ପୂର୍ବରୁ ମଧ୍ୟ ଏଭଳି ପରାମର୍ଶ ଦେଇଛି।