ପ୍ରେମ, ବିଚ୍ଛେଦ ଓ ସ୍ମୃତିର ଭାବପ୍ରବଣ କାହାଣୀ ନେଇ ଫେରିଲେ ଇମତିଆଜ୍ ଅଲି

ପ୍ରସିଦ୍ଧ ନିର୍ଦ୍ଦେଶକ ଇମତିଆଜ୍ ଅଲି ତାଙ୍କର ନୂତନ ଚଳଚ୍ଚିତ୍ର ‘ମେ ୱାପସ୍ ଆଉଙ୍ଗା’ ମାଧ୍ୟମରେ ପୁଣିଥରେ ଦର୍ଶକଙ୍କ ପାଇଁ ଆଣିଛନ୍ତି ଏକ ହୃଦୟସ୍ପର୍ଶୀ ପ୍ରେମ କାହାଣୀ । ଦିଲଜିତ୍ ଦୋସାଞ୍ଜ, ନାସିରୁଦ୍ଦିନ୍ ଶାହ, ବେଦାଙ୍ଗ ରୈନା ଏବଂ ଶରଭରୀ ୱାଗ ଅଭିନୀତ ଏହି ଚଳଚ୍ଚିତ୍ରର ଭାବପ୍ରବଣ ଟ୍ରେଲର ମୁକ୍ତିଲାଭ କରିଛି ।

ଟ୍ରେଲରରେ ଦର୍ଶକମାନେ ପାଇଛନ୍ତି କ୍ଲାସିକ୍ ଇମତିଆଜ୍ ଅଲିଙ୍କ ସିଗ୍ନେଚର ଶୈଳୀର ଏକ ଅନୁଭୂତି । ପ୍ରେମ, ବିଚ୍ଛେଦ, ସ୍ମୃତି ଓ ପୁନଃମିଳନର ଭାବନାକୁ ସୁନ୍ଦର ଭାବରେ ଉପସ୍ଥାପନ କରାଯାଇଛି । ଏହାସହିତ ଏ.ଆର୍. ରହମାନଙ୍କ ସୁମଧୁର ସଙ୍ଗୀତ ଟ୍ରେଲରକୁ ଆହୁରି ଆକର୍ଷଣୀୟ କରିଛି ।

ଚଳଚ୍ଚିତ୍ରର କାହାଣୀ ଭାରତ ବିଭାଜନ ସମୟର ସ୍ମୃତିକୁ କେନ୍ଦ୍ର କରି ଗଢ଼ାଯାଇଛି । ନାସିରୁଦ୍ଦିନ୍ ଶାହଙ୍କ ଚରିତ୍ରରେ ଦେଖିବାକୁ ମିଳିଛି ଏକ ଅପୂର୍ଣ୍ଣ ପ୍ରେମ କାହାଣୀର ବେଦନା, ଯାହାକୁ ସେ ଦଶକ ଧରି ନିଜ ମନରେ ଲୁଚାଇ ରଖିଛନ୍ତି । ଅନ୍ୟପଟେ ଦିଲଜିତ୍ ଦୋସାଞ୍ଜ ଜଣେ ପ୍ରସିଦ୍ଧ YouTuber ‘ଗୁରବୀର’ ଭୂମିକାରେ ଅଭିନୟ କରିଛନ୍ତି । ସେ ନିଜ ଜେଜେବାପାଙ୍କ ଶେଷ ଇଚ୍ଛା ପୂରଣ ପାଇଁ ପାକିସ୍ତାନ ଯାଇ ତାଙ୍କ ହଜିଯାଇଥିବା ପ୍ରେମିକାଙ୍କୁ ଖୋଜିବାରେ ବାହାରିଥାନ୍ତି ।

ଟ୍ରେଲରରେ ବେଦାଙ୍ଗ ରୈନା ଏବଂ ଶରଭରୀ ୱାଗଙ୍କ ଯୁବ ପ୍ରେମ କାହାଣୀକୁ ମଧ୍ୟ ସୁନ୍ଦର ଭାବରେ ଦେଖାଯାଇଛି । ରୋମାନ୍ସ, ଭାବନା, ସ୍ମୃତି ଓ ବିଚ୍ଛେଦରେ ପରିପୂର୍ଣ୍ଣ ଏହି କାହାଣୀ ଦର୍ଶକଙ୍କୁ ଭାବପ୍ରବଣ କରିଦେବ ବୋଲି ଆଶା କରାଯାଉଛି ।
ଫିଲ୍ମଟିରେ ପୁଣିଥରେ ଏକାଠି କାମ କରିଛନ୍ତି ପ୍ରସିଦ୍ଧ ତ୍ରିମୂର୍ତ୍ତି — ଏ.ଆର୍. ରହମାନ, ଇର୍ଶାଦ କାମିଲ୍ ଏବଂ ଇମତିଆଜ୍ ଅଲି । ସେମାନଙ୍କର ଏହି ପୁନର୍ମିଳନକୁ ନେଇ ଦର୍ଶକମାନଙ୍କ ମଧ୍ୟରେ ଖୁବ୍ ଉତ୍ସାହ ଦେଖାଯାଉଛି ।

ବିର୍ଲା ଷ୍ଟୁଡିଓ, ଆପଲାଜ୍ ଏଣ୍ଟରଟେନମେଣ୍ଟ୍ ଏବଂ ୱିଣ୍ଡୋ ସିଟ୍ ଫିଲ୍ମ୍ସ ଦ୍ୱାରା ନିର୍ମିତ ‘ମେ ୱାପସ୍ ଆଉଙ୍ଗା’ ଆସନ୍ତା ଜୁନ୍ 12, 2026 ରେ ସାରା ଦେଶର ସିନେମା ହଲରେ ମୁକ୍ତିଲାଭ କରିବ ।