କୋଲକାତା : ମମତା ବାନାର୍ଜୀ ଏବଂ ତାଙ୍କ ଭଣଜା ଅଭିଷେକ ବାନାର୍ଜୀଙ୍କ ସମସ୍ୟା କମିବାର ନାଁ ନେଉନି । ଦଳର ବିଦ୍ରୋହ ମଧ୍ୟରେ ଉଭୟ ନେତା ତଦନ୍ତ ଏଜେନ୍ସିଙ୍କ ଟାର୍ଗେଟରେ ଆସିଛନ୍ତି । ଆଜି ସକାଳେ ଦୁଇଟି ଥାନାର ପୋଲିସ TMC ନେତା ଅଭିଷେକ ବାନାର୍ଜୀଙ୍କ କାଲୀଘାଟରେ ଥିବା ଘରେ ପହଞ୍ଚି ଯାଞ୍ଚ କରିଥିବା ଜଣାପଡିଛି । ପୋଲିସ ରାତି ୩ଟା ପରେTMC ନେତା ଅଭିଷେକଙ୍କ ଘରେ ପହଞ୍ଚି ୭ ଟାରେ ବାହାରିଥିଲା ବୋଲି କୁହାଯାଉଛି ।
ପ୍ରକୃତରେ, ଶାଳବନୀ ଥାନାର ପୋଲିସ ଅଭିଷେକ ବାନାର୍ଜୀଙ୍କ ପିଏ ସୁମିତ ରାୟଙ୍କୁ ଖୋଜୁଛି । ସୁମିତ ରାୟ ନିର୍ବାଚନ ଟିକେଟ୍ ପାଇବା ପାଇଁ ଟଙ୍କା ଗ୍ରହଣ କରିଥିବା ଅଭିଯୋଗ ଉପରେ ଏହି ସର୍ଚ୍ଚ ଅପରେସନ୍ ଚାଲିଛି। ସୁମିତଙ୍କ ଉପରେ ବିଧାନସଭା ନିର୍ବାଚନ ପାଇଁ ଟିକେଟ୍ ପାଇବା ପାଇଁ ଟଙ୍କା ଗ୍ରହଣ କରିବାର ଅଭିଯୋଗ ରହିଛି । ସୁମିତଙ୍କୁ ଖୋଜିବା ପାଇଁ ଆଜି ସକାଳୁ ଶାଳବନୀ ଥାନାର ପୋଲିସ କୋଲକାତା ପୋଲିସ ସହ ମିଶି ଅଭିଷେକଙ୍କ ଘର ଯାଞ୍ଚ କରିଥିଲେ । ମାମଲାର ସୂଚନା ପାଇବା ପରେ ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀ ମଧ୍ୟ ଅଭିଷେକଙ୍କ ଘରେ ପହଞ୍ଚିଥିଲେ। ଏହା ପୂର୍ବରୁ CID ଅଭିଷେକ ବାନାର୍ଜୀଙ୍କୁ ଏକ ନୋଟିସ୍ ଜାରି କରିଥିଲା । ଯେଉଁଥିରେ ତାଙ୍କୁ ନିର୍ବାଚନ ପ୍ରଚାର ସମୟରେ ଦିଆଯାଇଥିବା ଉତ୍ତେଜନାପୂର୍ଣ୍ଣ ବୟାନ୍ ସମ୍ପର୍କରେ ଜୁନ୍ ୧୬ ତାରିଖରେ CID ଅଧିକାରୀଙ୍କ ସମ୍ମୁଖରେ ହାଜର ହେବାକୁ ନିର୍ଦ୍ଦେଶ ଦିଆଯାଇଛି । ଏଥିସହ ଯଥାର୍ଥ ପ୍ରକ୍ରିୟା ଅନୁଯାୟୀ ତଦନ୍ତ କରାଯାଉଛି ।
ଅନ୍ୟପଟେ ବିଧାନସଭା ନିର୍ବାଚନ ପୂର୍ବରୁ ଏକ ରାଲିରେ ଧାର୍ମିକ ଭାବନାକୁ ଆଘାତ ଦେଇଥିବା ଅଭିଯୋଗରେ ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ବିରୋଧରେ ଏକ ଏଫଆଇଆର ରୁଜୁ କରାଯାଇଛି । ଏଥିସହ ତାଙ୍କ ବିରୋଧରେ ଦୁଇଟି ସମ୍ପ୍ରଦାୟ ମଧ୍ୟରେ ଥିବା ଶତ୍ରୁତାକୁ ପ୍ରୋତ୍ସାହନ କରିବା, ଧମକ ଦେବା ଏବଂ ଶାନ୍ତି ଭଙ୍ଗ କରିବାର ଅଭିଯୋଗ ରହିଛି ।