ପିଏମ୍ ମୋଦିଙ୍କୁ ନେଇ ଖଡ଼ଗେଙ୍କ ବିବାଦୀୟ ମନ୍ତବ୍ୟରେ ରାଜନୈତିକ ଝଡ଼ । ମୋଦିଙ୍କୁ ନେଇ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେଙ୍କ ବିବାଦୀୟ ମନ୍ତବ୍ୟକୁ ନେଇ ଜାତୀୟ ରାଜନୀତି ସରଗରମ । ଆଜି ଦେଶବ୍ୟାପୀ ପ୍ରତିବାଦ ପାଇଁ ଘୋଷଣା କରିଛି ବିଜେପି । ବିହାରର ପାଟନାରେ ସାଧାରଣ ସଭାରେ ଖଡ଼ଗେ କହିଥିବା ‘ମୋଦି କା ବାପ୍ ଭି ଜାଏଗା’ ମନ୍ତବ୍ୟକୁ ନେଇ ବିଜେପି ତୀବ୍ର ପ୍ରତିକ୍ରିୟା ଦେଇଛି । ପ୍ରଧାନମନ୍ତ୍ରୀ ଓ ତାଙ୍କ ପରିବାରକୁ ଅପମାନ କରାଯାଇଥିବା ଅଭିଯୋଗ କରିଛି ବିଜେପି ।
ଅନ୍ୟପଟେ ସଭା ମଝିରେ ଜଣେ ବ୍ୟକ୍ତିଙ୍କ ହସ୍ତକ୍ଷେପ ପରେ ଏହି ମନ୍ତବ୍ୟ ଆସିଥିବା କହି ଘଟଣାର ପ୍ରସଙ୍ଗ ଉଠାଇଛି କଂଗ୍ରେସ । ବିହାରର ପ୍ରଥମ ମୁଖ୍ୟମନ୍ତ୍ରୀ ଡକ୍ଟର ଶ୍ରୀକୃଷ୍ଣ ସିଂହଙ୍କ ୧୩୯ତମ ଜୟନ୍ତୀ ଅବସରରେ ପାଟନାର ବାପୁ ସଭାଗାରରେକାର୍ଯ୍ୟକ୍ରମ ହୋଇଥିଲା । ସଭାରେ ଖଡ଼ଗେ ବିଜେପି, ଆରଏସଏସ ଏବଂ କେନ୍ଦ୍ର ସରକାରଙ୍କ ବିରୋଧରେ ଭାଷଣ ଦେଉଥିବା ସମୟରେ ହଠାତ୍ ହୋହଲ୍ଲା ଆରମ୍ଭ ହୋଇଥିଲା । ଖଡ଼ଗେଙ୍କ ଭାଷଣ ଚାଲିଥିବା ବେଳେ ସଭାରେ ଉପସ୍ଥିତ ଜଣେ ବ୍ୟକ୍ତି ମୋଦି ନହିଁ ଜାଏଗା ବୋଲି କହିଥିଲେ । ଏହାର ଜବାବରେ ଖଡ଼ଗେ ହିନ୍ଦୀରେ କହିଥିଲେ, ମୋଦୀ କା ବାପ୍ ଭି ଜାଏଗା । ଅର୍ଥାତ୍ ମୋଦିଙ୍କ ବାପା ମଧ୍ୟ ଯିବେ ବୋଲି ମନ୍ତବ୍ୟ ଦେଇଥିଲେ । ଏହି ମନ୍ତବ୍ୟର ଭିଡିଓ ସାମ୍ନାକୁ ଆସିବା ପରେ ରାଜନୈତିକ ବିବାଦ ଆରମ୍ଭ ହୋଇଥିଲା । ଜଣେ ଜାତୀୟ ଦଳର ଅଧ୍ୟକ୍ଷଙ୍କ ମୁହଁରୁ ଏଭଳି ଭାଷା ଶୋଭା ପାଉନାହିଁ ବୋଲି ବିଜେପି ନେତାମାନେ ଅଭିଯୋଗ କରିଛନ୍ତି ।
କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଖଡ଼ଗେଙ୍କ ମନ୍ତବ୍ୟକୁ ନିନ୍ଦା କରିଛନ୍ତି । କଂଗ୍ରେସ ରାଜନୈତିକ ଶାଳୀନତାର ସମସ୍ତ ସୀମା ଅତିକ୍ରମ କରିଛି ବୋଲି ସେ ଅଭିଯୋଗ କରିଛନ୍ତି । ଶାହ କହିଛନ୍ତି, ପୂର୍ବରୁ ମଧ୍ୟ କଂଗ୍ରେସ ନେତାମାନେ ପ୍ରଧାନମନ୍ତ୍ରୀ ମୋଦୀ ଓ ତାଙ୍କ ପରିବାର ବିରୋଧରେ ଆପତ୍ତିଜନକ ଶବ୍ଦ ବ୍ୟବହାର କରିଛନ୍ତି । ରାଜନୈତିକ ପରାଜୟ ଯୋଗୁଁ କଂଗ୍ରେସ ହତାଶ ହୋଇ ଏଭଳି ଭାଷା ବ୍ୟବହାର କରୁଥିବା ସେ ଅଭିଯୋଗ କରିଛନ୍ତି । ବିଜେପିର ଅନ୍ୟ ନେତାମାନେ ମଧ୍ୟ ଖଡ଼ଗେଙ୍କ ମନ୍ତବ୍ୟକୁ ନେଇ କଂଗ୍ରେସକୁ ଟାର୍ଗେଟ୍ କରିଛନ୍ତି । ରାଜନୈତିକ ମତଭେଦ ରହିପାରେ, କିନ୍ତୁ ପ୍ରଧାନମନ୍ତ୍ରୀଙ୍କ ପରିବାରକୁ ଟାଣିବା ଗ୍ରହଣୀୟ ନୁହେଁ ବୋଲି ଦଳ ପକ୍ଷରୁ କୁହାଯାଇଛି । ଅନ୍ୟପଟେ ଘଟଣାର ପୃଷ୍ଠଭୂମିକୁ ନେଇ କଂଗ୍ରେସ ପକ୍ଷରୁ ସଫେଇ ଦିଆଯାଇଛି ।
ଖଡ଼ଗେ ଭାଷଣ ଦେଉଥିବା ସମୟରେ ଜଣେ ବ୍ୟକ୍ତି ମଝିରେ କଥା କହି ବାଧା ସୃଷ୍ଟି କରିଥିଲେ । ସେହି ମନ୍ତବ୍ୟର ତତ୍କାଳ ପ୍ରତିକ୍ରିୟା ଭାବେ ଖଡ଼ଗେ ଏଭଳି କହିଥିବା ଯୁକ୍ତି ଉଠିଛି । ତେବେ ଏହି ବିବାଦରେ ଆଉ ଏକ ନୂଆ ତଥ୍ୟ ସାମ୍ନାକୁ ଆସିଛି । ସଭାରେ କଥା କହିଥିବା ବ୍ୟକ୍ତି ନିଜକୁ ସନ୍ତୋଷ କୁମାର ବୋଲି ପରିଚୟ ଦେଇଛନ୍ତି। ତାଙ୍କ କଥାକୁ ଭୁଲ୍ ବୁଝାଯାଇଥିବା ସେ ଦାବି କରିଛନ୍ତି । ସନ୍ତୋଷ କୁମାରଙ୍କ କହିବା ଅନୁସାରେ, ସେ ପ୍ରକୃତରେ କହିବାକୁ ଚାହୁଁଥିଲେ ଯେ ଜନଆନ୍ଦୋଳନ ନହେଲେ ମୋଦୀ କ୍ଷମତାରୁ ଯିବେ ନାହିଁ । କିନ୍ତୁ ତାଙ୍କ କଥାର କେବଳ ଗୋଟିଏ ଅଂଶ ଶୁଣାଯିବାରୁ ଭୁଲ୍ ବୁଝାମଣା ସୃଷ୍ଟି ହୋଇଥିଲା । ସେ ନିଜେ ମୋଦୀଙ୍କ ବିରୋଧରେ ଥିବା ଏବଂ ଖଡ଼ଗେଙ୍କୁ ବିରୋଧ କରିବା ତାଙ୍କ ଉଦ୍ଦେଶ୍ୟ ନଥିଲା ବୋଲି ଦାବି କରିଛନ୍ତି। ଏହି ଘଟଣାକୁ ନେଇ ମଧ୍ୟ ବିଜେପି କଂଗ୍ରେସକୁ ସମାଲୋଚନା କରିଛି । ଭିନ୍ନ ମତ ରଖୁଥିବା ଲୋକଙ୍କ ସହ ଏଭଳି ବ୍ୟବହାର ଗଣତାନ୍ତ୍ରିକ ମୂଲ୍ୟବୋଧର ପରିପନ୍ଥୀ ବୋଲି ବିଜେପି ନେତାମାନେ କହିଛନ୍ତି । କାର୍ଯ୍ୟକ୍ରମରେ ଖଡ଼ଗେ ନିର୍ବାଚନ ପ୍ରକ୍ରିୟାକୁ ନେଇ ମଧ୍ୟ କେନ୍ଦ୍ର ସରକାର ଓ ନିର୍ବାଚନ କମିଶନଙ୍କୁ ଟାର୍ଗେଟ୍ କରିଥିଲେ । ବିହାର, ମହାରାଷ୍ଟ୍ର, ହରିୟାଣା ଓ ପଶ୍ଚିମବଙ୍ଗରେ ନିର୍ବାଚନୀ ଅନିୟମିତତା ହୋଇଥିବା ସେ ଅଭିଯୋଗ କରିଥିଲେ ।
ଭୋଟର ତାଲିକାର ସ୍ୱତନ୍ତ୍ର ସଂଶୋଧନ ପ୍ରକ୍ରିୟା ବା SIR ମାଧ୍ୟମରେ ବିରୋଧୀ ସମର୍ଥକଙ୍କ ନାମ ବାଦ୍ ଦିଆଯାଉଥିବା ସେ ଦାବି କରିଥିଲେ । ଏହାସହ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ଇସ୍ତଫା ଦାବି କରିଥିଲେ ଖଡ଼ଗେ । ତେବେ ଏହି ଅଭିଯୋଗଗୁଡ଼ିକ ଖଡ଼ଗେଙ୍କ ରାଜନୈତିକ ଦାବି । ସେଗୁଡ଼ିକୁ ପ୍ରମାଣିତ ତଥ୍ୟ ଭାବେ ଗ୍ରହଣ କରାଯାଇପାରିବ ନାହିଁ। ପାଟନା ସଭାର ଏହି ଘଟଣା ପରେ ରାଜନୈତିକ ଭାଷା ଓ ଶାଳୀନତାକୁ ନେଇ ନୂଆ ବିତର୍କ ଆରମ୍ଭ ହୋଇ ଛି। ବିଜେପି ଖଡ଼ଗେଙ୍କ ମନ୍ତବ୍ୟକୁ ପ୍ରଧାନମନ୍ତ୍ରୀଙ୍କ ପରିବାର ପ୍ରତି ଅପମାନ ବୋଲି କହୁଥିବା ବେଳେ ଅନ୍ୟପଟେ ସଭାରେ ହୋଇଥିବା ବାଧା ଓ ଭୁଲ୍ ବୁଝାମଣାର ପ୍ରସଙ୍ଗ ସାମ୍ନାକୁ ଆସିଛି । ଏବେ ଖଡ଼ଗେଙ୍କ ମନ୍ତବ୍ୟ, ବିଜେପିର ପ୍ରତିକ୍ରିୟା ଏବଂ ସନ୍ତୋଷ କୁମାରଙ୍କ ସଫେଇକୁ ନେଇ ଜାତୀୟ ରାଜନୀତିରେ ଚର୍ଚ୍ଚା ଜାରି ରହିଛି ।