ଏକ ଦେଶ ଏକ ନିର୍ବାଚନ କମିଟିରେ ରହିବାକୁ ମନା କଲେ ଅଧୀର ରଞ୍ଜନ

କୋଲକାତା : ଏକ ଦେଶ ଏକ ନିର୍ବାଚନ ସମ୍ପର୍କିତ ପ୍ରସଙ୍ଗ ନେଇ ଦେଶରେ ରାଜନୀତି ତୀବ୍ର ହେବାରେ ଲାଗିଛି। କେନ୍ଦ୍ରରେ ଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାର ଏକ ଅନୁସନ୍ଧାନ କମିଟି ଗଠନ କରିଛନ୍ତି। କମିଟିର ସଭାପତି, ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କ ସମେତ ୮ ଜଣ ସଦସ୍ୟଙ୍କୁ ଅନ୍ତର୍ଭୁକ୍ତ କରାଯାଇଛି। କଂଗ୍ରେସ ନେତା ଅଧିର ରଞ୍ଜନ ଚୌଧୁରୀଙ୍କୁ କମିଟିର ସଦସ୍ୟ ଭାବରେ ନିଯୁକ୍ତ କରାଯାଇଛି, କିନ୍ତୁ ସେ ସଦସ୍ୟ ହେବାକୁ ମନା କରି ଦେଇଛନ୍ତି।

ଜି-୨୦ ଶିଖର ସମ୍ମିଳନୀର ଏକ ସପ୍ତାହ ପରେ କେନ୍ଦ୍ର ସରକାର ସଂସଦର ଏକ ସ୍ବତନ୍ତ୍ର ଅଧିବେଶନ ଡାକିଛନ୍ତି। ଏହି ସ୍ବତନ୍ତ୍ର ଅଧିବେଶନ ୧୮ରୁ ୨୨ ସେପ୍ଟେମ୍ବର ପର୍ଯ୍ୟନ୍ତ ଚାଲିବ, ଯେଉଁଥିରେ ଏକ ଦେଶ ଏକ ନିର୍ବାଚନ ବିଲ ଉପସ୍ଥାପିତ ହେବ ବୋଲି ଆଶା କରାଯାଉଛି। ଏ ସମ୍ପର୍କରେ ଶୁକ୍ରବାର ଏକ ବଡ଼ ପଦକ୍ଷେପ ନେଇ ମୋଦି ସରକାର ପୂର୍ବତନ ରାଷ୍ଟ୍ରପତି ରାମ ନାଥ କୋବିନ୍ଦଙ୍କ ଅଧ୍ୟକ୍ଷତାରେ ଏକ ୮ ଜଣିଆ କମିଟି ଗଠନ କରିଥିଲେ। ଏହାର ଗୋଟିଏ ଦିନ ପରେ ଶନିବାର କମିଟି ସଦସ୍ୟଙ୍କ ନାମ ଘୋଷଣା କରାଯାଇଥିଲା।

କଂଗ୍ରେସ ଏମପି ଅଧିର ରଞ୍ଜନ ଚୌଧୁରୀ ଏ ସମ୍ପର୍କରେ କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କୁ ଚିଠି ଲେଖିଛନ୍ତି। ଏକ ଦେଶ ଏକ ନିର୍ବାଚନ ଉପରେ କେନ୍ଦ୍ର ଦ୍ୱାରା ଗଠିତ ୮ ଜଣିଆ କମିଟିର ଅଂଶ ହେବାକୁ ସେ ଏହି ନିମନ୍ତ୍ରଣକୁ ପ୍ରତ୍ୟାଖ୍ୟାନ କରିଛନ୍ତି। ସେହି କମିଟିରେ କାମ କରିବାକୁ ମନା କରିବାରେ ତାଙ୍କର କୌଣସି ଦ୍ୱିଧା ନାହିଁ ବୋଲି ସେ ଚିଠିରେ ଲେଖିଛନ୍ତି। ମୁଁ ଭୟ କରୁଛି ଏହା ସମ୍ପୂର୍ଣ୍ଣ ରୂପେ ଠକେଇ ପଦକ୍ଷେପ।