ନୂଆଦିଲ୍ଲୀ (ଆମ ଟିଭି): ଅମୃତପାଲ ସିଂଙ୍କୁ ଖୋଜିବାକୁ ଜୋରଦାର ପ୍ରୟାସ ଜାରି ରଖିଛି ପଞ୍ଜାବ ପୋଲିସ । ଏହାରି ଭିତରେ ପଳାତକ ଅମୃତପାଲ ସିଂର ଆଉ ଏକ ସହଯୋଗୀ ଜୋଗା ସିଂକୁ ଗିରଫ କରିଛି ପଞ୍ଜାବ ପୋଲିସ । ପଞ୍ଜାବର ଡିଆଇଜି ବର୍ଡର ରେଞ୍ଜ ନରିନ୍ଦର ଭାର୍ଗବ ଶନିବାର କହିଛନ୍ତି ଯେ, ୱାରିସ ପଞ୍ଜାବ ଦେ ପ୍ରମୁଖ ଅମୃତପାଲ ସିଂର ମୁଖ୍ୟ ସହଯୋଗୀ ଜୋଗା ସିଂକୁ ସରହିନ୍ଦରୁ ଗିରଫ କରାଯାଇଛି । ଏହା ପୂର୍ବରୁ ଅମୃତପାଲ ସିଂକୁ ଶରଣ ଦେଇଥିବା ଅଭିଯୋଗରେ ପଞ୍ଜାବରେ ଦୁଇ ଜଣଙ୍କୁ ମଧ୍ୟ ଗିରଫ କରାଯାଇଥିଲା ।
ଅଧିକାରୀଙ୍କ କହିବା ଅନୁସାରେ ଗିରଫ କରାଯାଇଥିବା ବ୍ୟକ୍ତିଙ୍କ ଚିହ୍ନଟ ହୋସିୟାରପୁର ଜିଲ୍ଲାର ବାବକ ଗାଁ ନିବାସୀ ରାଜଦୀପ ସିଂ ଏବଂ ଜଲନ୍ଧର ଜିଲ୍ଲାର ନିବାସୀ ସରବଜିତ ସିଂହଙ୍କ ରୂପରେ ହୋଇଛି । ରାଜଦୀପ ସିଂ ଏବଂ ସରବଜିତ ସିଂଙ୍କୁ ଶୁକ୍ରବାର ରାତିରେ ମାଜିଷ୍ଟ୍ରେଟଙ୍କ ସାମ୍ନାରେ ହାଜର କରାଯାଇଥିଲା । ମାଜିଷ୍ଟ୍ରେଟ ଦୁଇଜଣଙ୍କ ଗୋଟିଏ ଦିନର ପୋଲିସ ହେପାଜତକୁ ପଠାଇଛନ୍ତି ।