“ଗେମ୍ ଓଭର” ଟିମ୍ ତରଫରୁ ସାମ୍ବାଦିକ ସମ୍ମିଳନୀ, ଡିସେମ୍ବରରେ ପୁଣି ଥରେ ହେବ ରିଲିଜ୍

ଚଳିତ ବର୍ଷ ଦଶହରା ବଜାରକୁ ସରଗରମ କରିବା ପାଇଁ ରିୟଲ ହିରୋ ଅର୍ଦ୍ଧେନ୍ଦୁ ସାହୁଙ୍କ ଓଡ଼ିଆ ଚଳଚ୍ଚିତ୍ର ଗେମ୍ ଓଭର ସାରା ଓଡିଶାରେ ମୁକ୍ତିଲାଭ କରିବା ପାଇଁ ସମସ୍ତ ପ୍ରସ୍ତୁତି ସରିଥିଲା ଏବଂ ମୁକ୍ତିଲାଭ ତାରିଖ ମଧ୍ୟ ଘୋଷଣା ହୋଇଥିଲା l ତେବେ ସେନ୍ସର ସାର୍ଟିଫିକେଟ ଆସିବା ବିଳମ୍ବ ହୋଇଥିବା କାରଣରୁ ଅକ୍ଟୋବର ୧୬ ତାରିଖ ପରିବର୍ତ୍ତେ ୧୮ ତାରିଖରେ ମୁକ୍ତିଲାଭ କରିଥିଲା l ସେହି ପରିପ୍ରେକ୍ଷୀରେ ଅର୍ଦ୍ଧେନ୍ଦୁ ସାହୁ ଏକ ସାମ୍ବାଦିକ ସମ୍ମିଳନୀ କରିଥିଲେ l ଅର୍ଦ୍ଧେନ୍ଦୁ ସାହୁଙ୍କ ସମେତ କୁନା ତ୍ରିପାଠୀ, ମହାଶ୍ଵେତା ରାୟ, ଜୀବନ ପଣ୍ଡା, ବିଭାସ, ଅଭିନେତ୍ରୀ ସୁପ୍ରିୟା ନାୟକ, ସୋମେଶ ମହାନ୍ତି ଏବଂ ଆକାଶ ପ୍ରମୁଖ ଉପସ୍ଥିତ ଥିଲେ l

ଅର୍ଦ୍ଧେନ୍ଦୁ ଏହି ସାମ୍ବାଦିକ ସମ୍ମିଳନୀରେ କହିଥିଲେ ଯେ, ଆମ ରାଜ୍ୟରେ ସୀମିତ ସିନେମା ହଲ୍ ଥିବାରୁ ଗେମ୍ ଓଭର ମୁକ୍ତିଲାଭ କରିବା ପାଇଁ ସମସ୍ୟା ଉପୁଜିଥିଲା l ସିନେ ଦର୍ଶକଙ୍କୁ କଥା ଦେଇଥିବାରୁ ଗୋଟିଏ ସପ୍ତାହ ପାଇଁ ଗୋଟିଏ ସିନେମା ହଲ୍ ରେ ମୁକ୍ତିଲାଭ କରିବା ପାଇଁ ନିଷ୍ପତ୍ତି ନେଇଥିଲେ l ସେହି ଗୋଟିଏ ସପ୍ତାହରେ ମୁକ୍ତିଲାଭ ଅବସରରେ ସିନେମା ସହିତ ଜଡିତ ଥିବା କିଛି କଳାକାର, ଟେକ୍ନିସିଆନ୍ସ, ସିନେ ସମୀକ୍ଷକ, ପାରିବାରିକ ବନ୍ଧୁ ଏବଂ କିଛି ଗଣମାଧ୍ୟମ ବନ୍ଧୁ ଦେଖିବାର ସୁଯୋଗ ପାଇଥିଲେ l ଦେଖିବା ପରେ ଦର୍ଶକ ଗେମ୍ ଓଭର ଚଳଚ୍ଚିତ୍ରକୁ ନେଇ ବେଶ ପ୍ରଶଂସା କରିଥିଲେ l ଦର୍ଶକଙ୍କ ଭାବାବେଗକୁ ଆଖିରେ ରଖି ଆସନ୍ତା ଡିସେମ୍ବର ମାସରେ ପୁଣି ଥରେ ଗେମ୍ ଓଭର ମୁକ୍ତିଲାଭ କରିବ ବୋଲି ଅର୍ଦ୍ଧେନ୍ଦୁ ଏହି ସାମ୍ବାଦିକ ସମ୍ମିଳନୀରେ ପ୍ରକାଶ କରିଥିଲେ l

ପ୍ରତ୍ୟେକ ବର୍ଷ ରଜ, ଦଶହରା ଭଳି ଗଣପର୍ବରେ ଅର୍ଦ୍ଧେନ୍ଦୁ ଓଡ଼ିଆ ସିନେ ଦର୍ଶକଙ୍କୁ ବଡ଼ ପରଦାରେ ମନୋରଞ୍ଜନ ଯୋଗାଇବାକୁ ଚେଷ୍ଟା କରିଥାନ୍ତି l ଚଳିତ ବର୍ଷ ଡିସେମ୍ବର ଶେଷ ସପ୍ତାହରେ ପୁନର୍ବାର ସେନ୍ସର କରାଯାଇ ଗେମ୍ ଓଭର ମୁକ୍ତିଲାଭ କରିବ ବୋଲି ପ୍ରଯୋଜନା ସଂସ୍ଥା ତରଫରୁ ପ୍ରଚାର ପ୍ରସାର ମୁଖ୍ୟ ପ୍ରଣୟ ଜେଠୀ ସୂଚନା ଦେଇଛନ୍ତି।