ବର୍ଷା ପ୍ରିୟଦର୍ଶିନୀଙ୍କ ନୂଆ ଚଳଚ୍ଚିତ୍ର “ୱାଇଫ”ର ସ୍ପେସିଆଲ୍ ସ୍କ୍ରିନିଂ

ଭୁବନେଶ୍ୱର (ଆମ ଟିଭି): “ୱାଇଫ”ର ଅକୁହା କାହାଣୀର ମୁକସାକ୍ଷୀ କେବଳ ସେ ଘରର ଚାରିକାନ୍ଥ। ୱାଇଫର ହସଖୁସି, ତ୍ୟାଗ ବଳିଦାନ ଓ ସଂଘର୍ଷର ମୁକସାକ୍ଷୀ ହେଉଛନ୍ତି କେବଳ ଭଗବାନ। ଆଜିର ସମାଜରେ ବିବାହର ପରିଭାଷା ବଦଳିଯାଇଛି। ସମାଜରେ ଆମ ପରମ୍ପରାରେ ଶାସ୍ତ୍ରରେ ବିବାହ ଅନୁଷ୍ଠାନର ଭୂମିକା କଣ? ବୈବାହିକ ସମ୍ପର୍କରେ ମହତ୍ତ୍ଵ, ଦାୟିତ୍ଵ ଓ ସମ୍ମାନର କଥାକୁ ନେଇ ବଡ଼ ପରଦାରେ ମୁକ୍ତିଲାଭ କରିବାକୁ ଯାଉଛି ଲୋକପ୍ରିୟ ଅଭିନେତ୍ରୀ ବର୍ଷା ପ୍ରିୟଦର୍ଶିନୀଙ୍କ ନୂଆ ଚଳଚ୍ଚିତ୍ର “ୱାଇଫ୍” ଯାହାର ସ୍ପେସିଆଲ ସ୍କ୍ରିନିଂ ଭୁବନେଶ୍ୱର ସ୍ଥିତ କେଳୁଚରଣ ମହାପାତ୍ର ଓଡିଶୀ ଗବେଷଣା କେନ୍ଦ୍ରଠାରେ ହୋଇଛି l ଏହି ସ୍ପେସିଆଲ ସ୍କ୍ରିନିଂ ଦେଖିବା ପାଇଁ ଅନେକ ସାଟେଲାଇଟ ନ୍ୟୁଜ ଟେଲିଭିଜନ ଚ୍ୟାନେଲର ମୁଖ୍ୟ ସମ୍ପାଦକ, ରିପୋର୍ଟର୍ସ, ସୋସିଆଲ ମିଡ଼ିଆ ରିପୋର୍ଟର୍ସ, ବଲିଉଡର ନାମିଦାମୀ ଚଳଚ୍ଚିତ୍ର ପ୍ରଯୋଜକ, ନିର୍ଦ୍ଦେଶକ, ସିନେ ସମୀକ୍ଷକ, ପ୍ରଚାର ଓ ପ୍ରସାର ମୁଖ୍ୟ ପ୍ରଣୟ ଜେଠୀ ତଥା ୱାଇଫ ଚଳଚ୍ଚିତ୍ରର ସମସ୍ତ କ୍ରିଉ ଏକାଠି ଦେଖିଥିଲେ l
ଚଳଚ୍ଚିତ୍ର ରେ ଭରପୁର ମନୋରଞ୍ଜନ ସହିତ ଅନେକ ଶିକ୍ଷଣୀୟ ସାମାଜିକ ବାର୍ତ୍ତା ରହିଛି l ଯାହା ଦର୍ଶକ ନିଜ ଜୀବନ ସହିତ ସଂଯୋଗ କରିପାରିବେ l

ଚଳଚ୍ଚିତ୍ରକୁ ନିର୍ଦ୍ଦେଶନା ଦେଇଛନ୍ତି ସୁଧାକର ବସନ୍ତ l ସଂଳାପ ଲେଖିଛନ୍ତି ବିଜୟ ମଲ୍ଲ l ସଙ୍ଗୀତ ନିର୍ଦ୍ଦେଶନା ମଳୟ ମିଶ୍ର ଏବଂ ଗୀତ ରଚନା କରିଛନ୍ତି ବିଜୟ ମଲ୍ଲ ଏବଂ ଅରୁଣ ମନ୍ତ୍ରୀ l କଣ୍ଠଦାନ କରିଛନ୍ତି ଇରା ମହାନ୍ତି, ହ୍ୟୁମାନ ସାଗର ଏବଂ ସତ୍ୟଜିତ ପ୍ରଧାନ । ମୋଟ ୪ ଟି ଗୀତ ବେଶ ଶୃତି ମଧୁର ଓ ମେଲୋଡିଅସ ହୋଇଛି।

ତେବେ ନାରୀର ଏହି ଅକୁହା ଯାତ୍ରାର ସ୍ପେସିଆଲ୍ ସ୍କ୍ରିନିଂ ଦେଖି ଉପସ୍ଥିତ ସମସ୍ତ ଦର୍ଶକ ବହୁତ ପ୍ରଶଂସା କରିଛନ୍ତି ଏବଂ ଏହା ଆସନ୍ତା ଜାନୁଆରୀ ୩ ତାରିଖରେ ବଡ଼ପରଦାରେ ପ୍ରେକ୍ଷାଳୟରେ ଦେଖିବାକୁ ଅନୁରୋଧ କରିଛନ୍ତି l