ଫ୍ଲାଇଦୁବାଇ ବିମାନକୁ ଅପହରଣ କରିବା ଆଶଙ୍କା, ବିମାନରେ ଥିଲେ ୧୫୦ରୁ ଅଧିକ ଯାତ୍ରୀ

ଦୁବାଇ : ଦୁବାଇରୁ ଇସ୍ରାଏଲର ତେଲ ଅବିବକୁ ଯାଉଥିବା ଫ୍ଲାଇଦୁବାଇ ବିମାନକୁ ଅପହରଣ କରିନେଇଥିବା ଆଶଙ୍କା କରାଯାଉଛି । ଫ୍ଲାଇଟ୍ ଟ୍ରେକିଂ ଡାଟା ଅନୁସାରେ, ଦୁବାଇରୁ ତେଲ ଅବିବ ଯାଉଥିବା ଫ୍ଲାଇ ଦୁବାଇର ଏକ ଯାତ୍ରୀ ବିମାନ ସାଉଦି ଆରବ ଉପରେ ଉଡ଼ାଣ ଭରୁଥିବା ସମୟରେ ଏମରଜେନ୍ସୀ ଆଲର୍ଟ ଜାରି କରାଯାଇଛି ।

ସାଉଦି ଆରବ ଆକାଶ ସୀମାରେ ଉଡ଼ୁଥିବା ବେଳେ ବିମାନଟି ଜରୁରୀ ସଙ୍କେତ ଦେବା ପରେ ଏହାର ଗତିପଥ ବଦଳାଯାଇଥିଲା । ଫ୍ଲାଇଟ୍ ଟ୍ରାକିଂ ତଥ୍ୟ ଏବଂ ଇସ୍ରାଏଲୀ ସୁରକ୍ଷା ରିପୋର୍ଟ ଅନୁସାରେ, ବିମାନଟି ଉଡ଼ାଣ ସମୟରେ ସ୍କ୍ୱାକ୍ ୭୭୦୦ ଜରୁରୀ ସଙ୍କେତ ଦେଇଥିଲା । ଏହି କୋଡ୍ ସାଧାରଣତଃ ବିମାନରେ କୌଣସି ଜରୁରୀ ପରିସ୍ଥିତି ଉପୁଜିଲେ ବ୍ୟବହାର କରାଯାଏ । ଏହି ସଙ୍କେତ ପରେ ବିମାନକୁ ନେଇ ହାଇଜାକ୍ ଆତଙ୍କ ସୃଷ୍ଟି ହୋଇଥିଲା ଏବଂ ସୁରକ୍ଷା ବ୍ୟବସ୍ଥାକୁ ତୁରନ୍ତ ସକ୍ରିୟ କରାଯାଇଥିଲା । ତେବେ ବିମାନଟି ପ୍ରକୃତରେ ହାଇଜାକ୍ ହୋଇଥିବା ନେଇ କୌଣସି ନିଶ୍ଚିତ ସୂଚନା ନଥିଲା ।

ରିପୋର୍ଟ ଅନୁସାରେ, ବିମାନରେ ୧୫୦ରୁ ଅଧିକ ଯାତ୍ରୀ ଥିଲେ । ଜରୁରୀ ସଙ୍କେତ ପରେ ପରିସ୍ଥିତି ଉପରେ ନଜର ରଖିବାକୁ ଦୁଇଟି ଯୁଦ୍ଧ ବିମାନ ସକ୍ରିୟ କରାଯାଇଥିବା ରିପୋର୍ଟ ରହିଛି । ଘଟଣାକୁ ନେଇ ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଏବଂ ପ୍ରତିରକ୍ଷା ମନ୍ତ୍ରୀ ଇସ୍ରାଏଲ କାଟ୍ଜ ଜରୁରୀ ସୁରକ୍ଷା ଆଲୋଚନା କରିଥିବା ମଧ୍ୟ କୁହାଯାଇଛି । ଫ୍ଲାଇଦୁବାଇ ବିମାନଟି ପରେ ସାଉଦି ଆରବ ଆଡ଼କୁ ଡାଇଭର୍ଟ ହୋଇଥିଲା । କେଉଁ କାରଣରୁ ଜରୁରୀ ସଙ୍କେତ ଦିଆଯାଇଥିଲା ଏବଂ ବିମାନ ଭିତରେ ପ୍ରକୃତରେ କ’ଣ ଘଟିଥିଲା, ସେନେଇ ଅଧିକ ସ୍ପଷ୍ଟ ତଥ୍ୟକୁ ଅପେକ୍ଷା କରାଯାଉଛି ।