ମୟୂରଭଞ୍ଜ କାଇ ପିମ୍ପୁଡ଼ି ଚଟୁଣୀକୁ ମିଳିଲା ଜିଆଇ ଟ୍ୟାଗ
ମୟୂରଭଞ୍ଜ କାଇ ପିମ୍ପୁଡି ଚଟଣୀକୁ ମିଳିଲା ଜିଆଇ ଟ୍ୟାଗ୍ ମାନ୍ୟତା। ଭାରତ ସରକାରଙ୍କ ଜିଓଗ୍ରାଫିକାଲ ଇଣ୍ଡିକେଟର ଜୋନାଲରେ କାଇ ପିମ୍ପୁଡି ଓ ମୟୂରଭଞ୍ଜର ପରିଚୟକୁ ନେଇ ସ୍ୱୀକୃତି ମିଳିଥିବା ଜଣାପଡିଛି। ଏହା ପରେ ଜିଲ୍ଲାରେ ଖୁସିର ଲହର ଖେଳି ଯାଇଛି।
ମୟୂରଭଞ୍ଜ ଏକ ଆଦିବାସୀ ଅଧ୍ୟୁଷିତ ଜିଲ୍ଲା। ବଣ ପାହାଡ଼ ଘେରା ଏହି ଜିଲ୍ଲାରେ ରହିଛି ଶିଳିପାଳ ଅଭୟାରଣ୍ୟ ଓ ଅନେକ ଛୋଟ ବଡ଼ ଜଙ୍ଗଲ ରହିଛି। ଜଙ୍ଗଲରେ ବହୁ ମାତ୍ରାରେ ବଡ଼ବଡ଼ ଶାଳ, ଆମ୍ୱ ଓ ଅନ୍ୟା ଗଛ ରହିଛି। ଏହି ଗଛରେ କାଇ ପିମ୍ପୁଡ଼ି ବସା ବାନ୍ଦିଥାଆନ୍ତି। ଯାହାକୁ ଆଦିବାସୀମାନେ ଖାଦ୍ୟ ଭାବେ ସେବନ କରିଥାଆନ୍ତି। ଏଥିରେ ବିଭିନ୍ନ ଔଷଧୀୟ ଗୁଣ ରହିଅଛି ବୋଲି ବିଶ୍ୱାସ ରହିଛି। କାଇ ପିମ୍ପୁଡି ଖାଇଲେ ଥଣ୍ଡା, କାଶ, ଚର୍ମ ପରି ବହୁ ରୋଗରୁ ମୁକ୍ତି ମିଳିଥାଏ ବୋଲି କୁହାଯାଏ। ଯେଉଁଥିପାଇଁ ଆଦିବାସୀମାନେ କେଉଁ କାଳରୁ କାଇକୁ ଖାଇଥାଆନ୍ତି।
ମୟୂରଭଞ୍ଜରେ ପର୍ଯ୍ୟପ୍ତ ପରିମାଣରେ ମିଳୁଥିବା କାଇକୁ ଜିଆଇ ଟ୍ୟାଗ୍ ମାନ୍ୟତା ପାଇଁ ବିଭିନ୍ନ ଫୋରମରେ ଦାବି ହୋଇଆସୁଲା। ପରିଶେଷରେ ଶୁକ୍ରବାର କାଇ ପିମ୍ପୁଡିକୁ ମୟୂରଭଞ୍ଜର ଜିଓଗ୍ରାଫିକାଲ ଇଣ୍ଡିକେଟର ଭାବେ ପରିଚୟ ମିଳିପାରିଛି। କାଇ ବ୍ୟତୀତ ଓଡ଼ିଶାର ଖଜୁରୀ ଗୁଡ଼, ଢେଙ୍କାନାଳ ମଗଜି ଲଡୁ, ନୟାଗଡ଼ର କଣ୍ଟିମୁଣ୍ଡି ବାଇଗଣ, କୋରାପୁଟର କଳାଜିରା ଚାଉଳ ଓ ରାୟଗଡ଼ାର ଲାଞ୍ଜିଆ ସରା ପେଣ୍ଟିଂକୁ ଜିଓଗ୍ରାଫିକାଲ୍ ଇଣ୍ଡିକେଟର ଭାବେ ସ୍ୱୀକୃତି ମିଳିଛି।