କେଜ୍ରିୱାଲଙ୍କୁ ମୁଖ୍ୟମନ୍ତ୍ରୀ ପଦରୁ ହଟାଇବା ଆବେଦନକୁ ଖାରଜ
ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ମୁଖ୍ୟମନ୍ତ୍ରୀ ପଦରୁ ହଟାଇବା ଆବେଦନକୁ ଖାରଜ କଲେ ହାଇକୋର୍ଟ। ଦିଲ୍ଲୀ ଅବକାରୀ ନୀତି ଦୁର୍ନୀତି ମାମଲାରେ ଏବେ ତିହାର ଜେଲରେ ବନ୍ଦୀ ଅଛନ୍ତି କେଜ୍ରିଓ୍ବାଲ। ଜେଲ ଯିବା ପରେ ସେ ନିଜ ପଦରୁ ଇସ୍ତଫା ଦିଅନ୍ତୁ ବୋଲି ବିରୋଧୀ ଦଳ ଦାବି କରିଆସୁଥିବା ବେଳେ ତାଙ୍କୁ ପଦରୁ ହଟାଇବା ପାଇଁ ହାଇକୋର୍ଟରେ ଏକ ଆବେଦନ କରାଯାଇଥିଲା। ଆଜି ଏହାର ଶୁଣାଣି କରି ଆବେଦନକୁ ଖାରଜ କରିଛନ୍ତି ହାଇକୋର୍ଟ।
ଆବେଦନର ଶୁଣାଣି କରୁଥିବା ଦିଲ୍ଲୀ ହାଇକୋର୍ଟର ଖଣ୍ଡପୀଠ କହିଛନ୍ତି ଯେ ମୁଖ୍ୟମନ୍ତ୍ରୀ ଭାବରେ ଦାୟିତ୍ବ ତୁଲାଇବେ କି ନାହିଁ ତାହା କେଜ୍ରିୱାଲଙ୍କ ବ୍ୟକ୍ତିଗତ ନିଷ୍ପତ୍ତି। ସେ ଚାହିଲେ ଇସ୍ତଫା ଦେଇପାରିବେ। ନଚେତ୍ ପଦରେ ରହି ଦାୟିତ୍ବ ତୁଲାଇ ପାରିବେ। ଏଥିରେ କୋର୍ଟ ହସ୍ତକ୍ଷେପ କରିବ ନାହିଁ।
କେଜ୍ରିୱାଲଙ୍କୁ ଦିଲ୍ଲୀର ମୁଖ୍ୟମନ୍ତ୍ରୀ ପଦରୁ ହଟାଇବା ପାଇଁ ଏହା ଥିଲା ଦ୍ୱିତୀୟ ଆବେଦନ ଯାହାକୁ ହାଇକୋର୍ଟ ଖାରଜ କରିଛନ୍ତି। ହିନ୍ଦୁ ସେନାର ସାମାଜିକ କର୍ମୀ ତଥା ଜାତୀୟ ସଭାପତି ବିଷ୍ଣୁ ଗୁପ୍ତା ଏହି ଆବେଦନ କରିଥିଲେ। ସେ କହିଥିଲେ ଯେ, କେଜ୍ରିୱାଲ ଗିରଫ ହେବା ପରେ ଦିଲ୍ଲୀରେ ସରକାର ଅଚଳ ହୋଇପଡ଼ିଛି। ଏହାର ଜବାବରେ କୋର୍ଟ କହିଥିଲେ, “ଆମେ କିପରି ଘୋଷଣା କରିପାରିବୁ ଯେ ସରକାର ଅଚଳ ହୋଇପଡ଼ିଛି? ଉପରାଜ୍ୟପାଳ ଏହାର ନିଷ୍ପତ୍ତି ନେବା ପାଇଁ ସମ୍ପୂର୍ଣ୍ଣ ଦକ୍ଷ। ତାଙ୍କୁ ଆମର ମାର୍ଗଦର୍ଶନର ଆବଶ୍ୟକତା ନାହିଁ। ଆଇନ ଅନୁଯାୟୀ ସେ ଯାହା କରିବା କଥା ତାହା କରିବେ।”