ପୁଣେ : ମହାରାଷ୍ଟ୍ର ପୁଣେ କେତନ ଅଗ୍ରୱାଲଙ୍କ ହତ୍ୟା ମାମଲାରେ କେତନଙ୍କ ବାପା ବିଶାଲ ଅଗ୍ରୱାଲ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସଙ୍କ ସହ ଦେଖା କରି ନ୍ୟାୟ ପାଇଁ ନିବେଦନ କରିଛନ୍ତି । ମୁଖ୍ୟମନ୍ତ୍ରୀ ଦୋଷୀକୁ କଠୋର ଦଣ୍ଡ ମିଳିବା ବୋଲି ଭରସା ଦେଇ ମାମଲାର ଶୁଣାଣି ଫାଷ୍ଟ ଟ୍ରାକ କୋର୍ଟରେ କରିବା ପାଇଁ ନିର୍ଦ୍ଦେଶ ଦେଇଛନ୍ତି ।
ମୁଖ୍ୟମନ୍ତ୍ରୀଙ୍କ ଅଫିସରୁ ସୋସିଆଲ ମିଡିଆ ପୋଷ୍ଟରେ କୁହାଯାଇଛି, ଲୋନାଭଲାର ଗ୍ରାମୀଣ ଅଞ୍ଚଳରେ କେତନ ଅଗ୍ରୱାଲଙ୍କ ଦୁଃଖଦ ହତ୍ୟା ମାମଲାରେ କେତନ ଅଗ୍ରଓ୍ବାଲଙ୍କ ବାପା ବିଶାଲ ଅଗ୍ରଓ୍ବାଲ ଆଜି ପୁଣେରେ ମୁଖ୍ୟମନ୍ତ୍ରୀ ଫଡନାଭିସଙ୍କୁ ଦେଖା କରି ନିଜ ପୁଅ ପାଇଁ ନ୍ୟାୟ ଦାବି କରିଛନ୍ତି । ଆମେ ଏଥିପାଇଁ ପ୍ରତିବଦ୍ଧ । ଏହି ମାମଲାରେ ଦୋଷୀକୁ ସବୁଠାରୁ କଡ଼ା ଦଣ୍ଡ ମିଳୁ । ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ ପରିବାରକୁ ନ୍ୟାୟ ଦେବାକୁ ମଧ୍ୟ ଭରସା ଦେଇଛନ୍ତି ।
ଏହି ମାମଲାକୁ ଫାଷ୍ଟ ଟ୍ରାକ କୋର୍ଟରେ ସ୍ପେଶାଲ ପବ୍ଲିକ ପ୍ରସିକ୍ୟୁଟର ନିଯୁକ୍ତ କରିବାକୁ ଦାବିକୁ ମଧ୍ୟ ମୁଖ୍ୟମନ୍ତ୍ରୀ ମାନିଛନ୍ତି । ଏହାକୁ ନେଇ ଆଇନ ବିଭାଗର ସଚିବଙ୍କୁ ନିର୍ଦ୍ଦେଶ ଦେଇଛନ୍ତି । ବରିଷ୍ଠ ଓକିଲ ଉଜ୍ଜ୍ବଳ ନିକମ ଏହି ମାମଲାରେ ସ୍ପେଶାଲ ପବ୍ଲିକ ପ୍ରସିକ୍ୟୁଟର ଭାବେ କାମ କରିବାକୁ ସହମତି ଦେଇଛନ୍ତି ।
ସୂଚନାଯୋଗ୍ୟ, ମହାରାଷ୍ଟ୍ର ପୁଣେର ୨୬ ବର୍ଷୀୟ ବ୍ୟବସାୟୀ କେତନ ଅଗ୍ରୱାଲଙ୍କୁ ଜୁନ୍ ୧୮ ରେ ଲୋହାଗଡ ଦୁର୍ଗରୁ ଟ୍ରେକିଂ କରିବାକୁ ନେଇ ଠେଲିଦେଇଥିଲା ଭାବିପତ୍ନୀ ସିୟା । ପ୍ରଥମରୁ ଏହାକୁ ଅଘଟଣ ବୋଲି ସମସ୍ତେ ଭାବିଥିବା ବେଳେ, ପୋଲିସ ଯାଞ୍ଚରେ ଏହା ହତ୍ୟା ବୋଲି ଜଣାପଡିଥିଲା । ଭାବିପତ୍ନୀ ସିୟା କେତନଙ୍କୁ ପ୍ରେମିକ ଚେତନ ସହ ମିଶି ପାହାଡରୁ ଠେଲି ଦେଇଥିଲେ । ସିୟା ଏବଂ କେତନଙ୍କ ବିବାହ ନଭେମ୍ବର ୨୦୨୬ରେ ହୋଇଥାନ୍ତା । ଏଥିପାଇଁ ୧୭ କୋଟିର ପ୍ୟାଲେସ ବୁକ୍ ହୋଇଥିଲା । କିନ୍ତୁ ସିୟା ପ୍ରେମିକ ଚେତନ ସହ ମିଶି କେତନକୁ ପାହାଡରୁ ଠେଲି ଦେଇଥିଲା ।