UNGAରେ ପାକିସ୍ତାନକୁ ଭାରତର କଡ଼ା ଜବାବ, ଉଠିଲା ଓସାମା ବିନ୍ ଲାଦେନ୍ ପ୍ରସଙ୍ଗ

ନୂଆଦିଲ୍ଲୀ: UNGAରେ ପାକିସ୍ତାନକୁ ଭାରତର କଡ଼ା ଜବାବ। ଓସାମା ବିନ୍ ଲାଦେନ୍ ପ୍ରସଙ୍ଗ ଉଠାଇଲେ ପେଟାଲ ଗହଲୋତ । ଜାତିସଂଘ ସାଧାରଣ ପରିଷଦରେ ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ସରିଫଙ୍କ ଭାଷଣ ପରେ ‘ରାଇଟ୍ ଅଫ୍ ରିପ୍ଲାଏ’ ବ୍ୟବହାର କରି କଡ଼ା ପ୍ରତିକ୍ରିୟା ଦେଇଛି ଭାରତ । ଜାତିସଂଘରେ ଭାରତର ସ୍ଥାୟୀ ମିଶନର ପ୍ରଥମ ସଚିବ ପେଟାଲ ଗହଲୋତ ପାକିସ୍ତାନର ମନ୍ତବ୍ୟକୁ ‘ବିଚିତ୍ର’ ବୋଲି କହିବା ସହ ଆତଙ୍କବାଦ ଓ ଓସାମା ବିନ୍ ଲାଦେନ୍ ପ୍ରସଙ୍ଗ ଉଠାଇଛନ୍ତି। ଗହଲୋତ କହିଛନ୍ତି, ବିଶ୍ୱ ୯/୧୧ ଆତଙ୍କବାଦୀ ଆକ୍ରମଣର ୨୫ ବର୍ଷ ପୂର୍ତ୍ତିକୁ ସ୍ମରଣ କରିବାର ମାତ୍ର ଦୁଇ ସପ୍ତାହ ପରେ ପାକିସ୍ତାନ ପକ୍ଷରୁ ଏଭଳି ମନ୍ତବ୍ୟ ଆସିଛି ।

ଏହି ପ୍ରସଙ୍ଗରେ ସେ ୯/୧୧ ଆକ୍ରମଣର ମାଷ୍ଟରମାଇଣ୍ଡ ଓସାମା ବିନ୍ ଲାଦେନ୍ ପାକିସ୍ତାନର ଆବୋଟାବାଦରେ, ପାକିସ୍ତାନ ସେନାର ପ୍ରମୁଖ ସାମରିକ ଏକାଡେମୀ ନିକଟରେ ରହୁଥିବା କଥା ମନେ ପକାଇ ଦେଇଛନ୍ତି । ପାକିସ୍ତାନୀ ସେନାକୁ ନେଇ ଶେହବାଜ ସରିଫଙ୍କ ଭାଷଣକୁ ମଧ୍ୟ ଭାରତ ଟାର୍ଗେଟ କରିଛି । ପାକିସ୍ତାନର ବର୍ତ୍ତମାନ ସରକାରକୁ ନେଇ ସେଠାକାର ବିରୋଧୀମାନେ ବ୍ୟବହାର କରୁଥିବା ‘Form 47 government’ ଶବ୍ଦକୁ ଉଲ୍ଲେଖ କରି ଗହଲୋତ ପାକିସ୍ତାନର ଗଣତାନ୍ତ୍ରିକ ବିଶ୍ୱସନୀୟତା ଉପରେ ପ୍ରଶ୍ନ ଉଠାଇଛନ୍ତି ।