ବାଲେଶ୍ୱର : ବାଲେଶ୍ୱର ବିଚିତ୍ରପୁର ଜଙ୍ଗଲରୁ ୫ ଓରାଙ୍ଗଉଟାନ୍ ଉଦ୍ଧାର ଘଟଣାର ରହସ୍ୟ ଖୋଲିବାକୁ ଜୋରଦାର ତଦନ୍ତ ଚଳାଇଛି କ୍ରାଇମବ୍ରାଞ୍ଚ STF । ତଦନ୍ତ ଆରମ୍ଭ ସମୟରେ DGP ଇନଚାର୍ଜ ବିନୟତୋଷ ମିଶ୍ର ଆଗାମୀ ୭ରୁ ୮ ଦିନ ମଧ୍ୟରେ ତଦନ୍ତରେ ବହୁତ ଅଗ୍ରଗତି ହେବ ବୋଲି କହିଥିଲେ । ଏହା ଭିତରେ CCTV ଯାଞ୍ଚ, ଶତାଧିକ ଲୋକଙ୍କୁ ପଚରାଉଚରା, କଳା ଥାର୍ ର ଗତିବିଧି ଯାଞ୍ଚଠାରୁ ଆରମ୍ଭ କରି ଓଡ଼ିଶା ବାହାରେ ମଧ୍ୟ ତଦନ୍ତର ଚେର ଲମ୍ବିଛି । ତଥାପି ପୂରା ରହସ୍ୟ ଉପରୁ ପରଦା ହଟାଇବା ତଦନ୍ତକାରୀଙ୍କ ପାଇଁ ସହଜ ନୁହେଁ । CCTVରେ ଧରାପଡ଼ିଥିବା କଳା ଥାର୍ STF ପାଇଁ ଏକ ବଡ଼ ସୁରାକ୍ । ଗାଡ଼ିଟି ବିଚିତ୍ରପୁର ଜଙ୍ଗଲ ନିକଟରେ ରାତିରେ ଦେଖାଯାଇଥିଲା । ତାହାର ଗତିବିଧିକୁ ଟ୍ରାକ୍ କରି ତଦନ୍ତକାରୀ ଟିମକ ଅନେକ ତଥ୍ୟ ସଂଗ୍ରହ କରିଛନ୍ତି । ଏହାକୁ ପ୍ରମାଣ କରିବା ପାଇଁ ତଦନ୍ତକାରୀଙ୍କୁ ଗାଡ଼ି, ତାହାର ଯାତ୍ରୀ ଓ ଓରାଙ୍ଗଉଟାନ୍ ଙ୍କ ମଧ୍ୟରେ ସିଧା ସମ୍ପର୍କ ସ୍ଥାପନ କରିବାକୁ ପଡ଼ିବ ।
ବାଲେଶ୍ୱର ଏବଂ ପଡ଼ୋଶୀ ଦିଘା ଅଞ୍ଚଳରେ Automatic Number Plate Recognition ବା ANPR କ୍ୟାମେରାର ଅଭାବ ତଦନ୍ତର ଆଉ ଏକ ବଡ଼ ସମସ୍ୟା । ସାଧାରଣ CCTVରେ ଗାଡ଼ି ଦେଖାଗଲେ ମଧ୍ୟ ନମ୍ବର ପ୍ଲେଟ୍ ସ୍ପଷ୍ଟ ନହେଲେ ଗାଡ଼ିର ମାଲିକ ଓ ଗତିପଥକୁ ନିର୍ଭୁଲ ଭାବେ ଚିହ୍ନଟ କରିବା କଷ୍ଟକର ହେଉଛି । ସେହିପରି ଓଡ଼ିଶା-ବଙ୍ଗ ସୀମାରେ ମୋବାଇଲ୍ ସିଗନାଲ୍ ର ଗୋଳମାଳ । STF ହଜାର ହଜାର ମୋବାଇଲ୍ ନମ୍ବରର ଟାୱାର ଡମ୍ପ୍ ଯାଞ୍ଚ କରୁଛି । କିନ୍ତୁ ଓଡ଼ିଶା-ପଶ୍ଚିମବଙ୍ଗ ସୀମାରେ ଦୁଇ ରାଜ୍ୟର ମୋବାଇଲ୍ ନେଟୱର୍କ ଓଭରଲାପ୍ କରୁଛି । ଫଳରେ ଜଣେ ବ୍ୟକ୍ତି ଓଡ଼ିଶାରେ ଥାଇ ମଧ୍ୟ ତାଙ୍କ ଫୋନ୍ ପଶ୍ଚିମବଙ୍ଗର ଟାୱାର ସହ ଯୋଡ଼ି ହୋଇପାରେ । ଏଥିପାଇଁ କେବଳ ଟାୱାର ଲୋକେସନ୍ ଆଧାରରେ କାହାର ନିର୍ଦ୍ଦିଷ୍ଟ ଗତିପଥ ପ୍ରମାଣ କରିବା ଜଟିଳ ହୋଇପଡ଼ିଛି ।
ଓରାଙ୍ଗଉଟାନ୍ ଭାରତର ମୂଳ ବନ୍ୟପ୍ରାଣୀ ନୁହନ୍ତି । ତେଣୁ ୫ ଓରାଙ୍ଗଉଟାନ୍ ଭାରତକୁ କେଉଁଠୁ ଓ କେଉଁ ରାସ୍ତାରେ ଆସିଲେ, ତାହା ଜାଣିବା ପାଇଁ ରାଜ୍ୟ ବାହାରର ତଥ୍ୟ ଓ ଅନ୍ୟ ଏଜେନ୍ସିର ସହଯୋଗ ଜରୁରୀ । ସେମାନେ ସ୍ଥଳପଥରେ ଆସିଥିଲେ ନା ଜଳପଥରେ ? ଉତ୍ତର-ପୂର୍ବ ଭାରତ ଦେଇ ଆସିଥିଲେ ନା ଅନ୍ୟ କୌଣସି ରୁଟ୍ ରେ ? ଏହି ରୁଟ୍ କୁ ପ୍ରମାଣ ସହ ଯୋଡ଼ିବା STF ପାଇଁ ବଡ଼ ଚ୍ୟାଲେଞ୍ଜ । ଏହି ମାମଲାର ସମାଧାନ କେବଳ ୫ ଓରାଙ୍ଗଉଟାନ୍ ଙ୍କୁ କିଏ ବିଚିତ୍ରପୁରରେ ଛାଡ଼ିଲା ? ତାହା ଚିହ୍ନଟ କରିବାରେ ସୀମିତ ନୁହେଁ । କିଏ ଏମାନଙ୍କୁ ବିଦେଶରୁ ଆଣିଲା ? କିଏ ଟଙ୍କା ଦେଇଥିଲା ? ଭାରତରେ କିଏ ରିସିଭ୍ କରିଥିଲା ? ଶେଷରେ କାହା ପାଖକୁ ପହଞ୍ଚାଇବାର ଥିଲା ? ଏହି ପୂରା ଚେନ୍ କୁ ପ୍ରମାଣ ସହ ଯୋଡ଼ିପାରିଲେ ହିଁ ଏକ ସମ୍ଭାବ୍ୟ ଆନ୍ତଃରାଜ୍ୟ ବା ଅନ୍ତର୍ଜାତୀୟ ବନ୍ୟପ୍ରାଣୀ ଚୋରାଚାଲାଣ ନେଟୱର୍କର ମୂଳ ପର୍ଯ୍ୟନ୍ତ STF ପହଞ୍ଚିପାରିବ ।
ସେପଟେ ନନ୍ଦନକାନନରେ ଉଦ୍ଧାର ହୋଇ ରହିଥିବା ୫ ଶିଶୁ ଓରାଙ୍ଗଉଟାନଙ୍କ ସ୍ବାସ୍ଥ୍ୟାବସ୍ଥା ପ୍ରତିଦିନ ଯାଞ୍ଚ କରୁଛି ବୈଷୟିକ କମିଟି । ସମସ୍ତଙ୍କ ସ୍ବାସ୍ଥ୍ୟାବସ୍ଥା ସ୍ଥିର ରହିଛି ଓ ସୁସ୍ଥ ରହିଛନ୍ତି । ଧୀରେ ଧୀରେ ଖାଦ୍ୟ ପରିମାଣ ବୃଦ୍ଧି କରିବାକୁ ଏବଂ ଖାଦ୍ୟରେ କଠିନ ଖାଦ୍ୟ ସାମିଲ କରିବାକୁ ପରାମର୍ଶ ଦେଇଛି କମିଟି ।