ସଚିନଙ୍କଠାରୁ ବିରାଟ ଶ୍ରେଷ୍ଠ? ଏବି ଡିଭିଲିୟର୍ସଙ୍କ ବଡ଼ ମତ
ବିଶ୍ୱ କ୍ରିକେଟର ମିଷ୍ଟର ୩୬୦ ଭାବେ ପରିଚିତ ଦକ୍ଷିଣ ଆଫ୍ରିକାର କିମ୍ବଦନ୍ତୀ ବ୍ୟାଟ୍ସମ୍ୟାନ ଏବି ଡିଭିଲିୟର୍ସ ଯେତେବେଳେ କିଛି କହନ୍ତି, ସେତେବେଳେ ସାରା କ୍ରିକେଟ ପ୍ରେମୀ ସ୍ତବ୍ଧ ହୋଇ ଶୁଣନ୍ତି । ନିକଟରେ ସେ ନିଜ ୟୁଟ୍ୟୁବ ଚ୍ୟାନେଲରେ ଭାରତୀୟ କ୍ରିକେଟର ଦୁଇ ମହାନାୟକ – କ୍ରିକେଟର ଭଗବାନ ସଚିନ ତେନ୍ଦୁଲକର ଏବଂ ରନ୍ ମେସିନ୍ ବିରାଟ କୋହଲିଙ୍କ ମଧ୍ୟରେ ଏକ ଆକର୍ଷଣୀୟ ତୁଳନା କରି ଏକ ବଡ଼ ଖୁଲାସା କରିଛନ୍ତି । ଡିଭିଲିୟର୍ସଙ୍କ ମତରେ, ବିରାଟ କୋହଲି ସଚିନଙ୍କ ଅପେକ୍ଷା ଅଧିକ ଶକ୍ତିଶାଳୀ ଓ ପ୍ରଭାବଶାଳୀ ସାବ୍ୟସ୍ତ ହୋଇଛନ୍ତି।
ଡିଭିଲିୟର୍ସଙ୍କ ଏହି ମନ୍ତବ୍ୟ ପଛରେ ଏକ ଗଭୀର ଯୁକ୍ତି ରହିଛି। ସେ କହିଛନ୍ତି ଯେ, ସଚିନ ତେନ୍ଦୁଲକର ହିଁ ସେହି ବ୍ୟକ୍ତି ଯିଏ ପ୍ରଥମେ ଭାରତୀୟ ବ୍ୟାଟ୍ସମ୍ୟାନଙ୍କୁ ବିଦେଶୀ ମାଟିରେ, ବିଶେଷ କରି ବାଉନ୍ସ ଓ କଠିନ ପିଚ୍ରେ ଲଢ଼ିବା ଶିଖାଇଥିଲେ । ସଚିନଙ୍କ ବ୍ୟାଟିଂ ଶୈଳୀ ଏବଂ ସଂଘର୍ଷ ଭାରତୀୟ କ୍ରିକେଟରେ ଏକ ନୂତନ ମାର୍ଗ ପ୍ରସ୍ତୁତ କରିଥିଲା। ଡିଭିଲିୟର୍ସଙ୍କ ଅନୁଯାୟୀ, ସଚିନ ହିଁ ସେହି ସୁଦୃଢ଼ ମୂଳଦୁଆ ପକାଇଥିଲେ, ଯାହା ଉପରେ ଆଜିର ଭାରତୀୟ ବ୍ୟାଟିଂ ସାମ୍ରାଜ୍ୟ ଗର୍ବର ସହ ଠିଆ ହୋଇଛି।