ରାଜ୍ୟ ପୋଲିସ ବିଭାଗରେ ଏକ ବଡ଼ଧରଣର ଅଦଳବଦଳ ଦେଖିବାକୁ ମିଳିଛି। ଆଇନ ଶୃଙ୍ଖଳା ସ୍ଥିତିକୁ ଅଧିକ ସୁଦୃଢ଼ ଏବଂ କ୍ରିୟାଶୀଳ କରିବା ଲକ୍ଷ୍ୟରେ ଓଡ଼ିଶା ସରକାରଙ୍କ ଗୃହ ବିଭାଗ ପକ୍ଷରୁ ୧୮ ଜଣ ବରିଷ୍ଠ ପୋଲିସ ଅଧିକାରୀଙ୍କ ବଦଳି କରାଯାଇଛି। ଏହି ବଡ଼ ରଦ୍ଦବଦଳରେ ରାଜ୍ୟର ଅନେକ ଗୁରୁତ୍ୱପୂର୍ଣ୍ଣ ଜିଲ୍ଲାର ଏସପିଙ୍କ ସମେତ କ୍ରାଇମବ୍ରାଞ୍ଚ ଓ ସ୍ପେଶାଲ ବ୍ରାଞ୍ଚ ଭଳି ଶୀର୍ଷ ବିଭାଗର ଅଧିକାରୀମାନେ ସାମିଲ ଅଛନ୍ତିଗୃହ ବିଭାଗ ପକ୍ଷରୁ ସ୍ପଷ୍ଟ କରାଯାଇଛି ଯେ, ବଦଳି ହୋଇଥିବା ସମସ୍ତ ୧୮ ଜଣ ଯାକ ଅଧିକାରୀ ନିଜ ନିଜର ପୁରୁଣା ଦାୟିତ୍ୱ ହସ୍ତାନ୍ତର କରି ତୁରନ୍ତ ନୂତନ ପଦବୀରେ କାର୍ଯ୍ୟଭାର ଗ୍ରହଣ କରିବେ।
ସରକାରଙ୍କ ପକ୍ଷରୁ ଜାରି ହୋଇଥିବା ନୂତନ ନିର୍ଦ୍ଦେଶନାମା ଅନୁଯାୟୀ, ଉଭୟ ଆଇପିଏସ୍ (IPS) ଏବଂ ଓପିଏସ୍ (OPS) କ୍ୟାଡରର ଅଧିକାରୀମାନଙ୍କୁ ନୂଆ ସ୍ଥାନରେ ଅବସ୍ଥାପିତ କରାଯାଇଛି।
ଏହି ଅଦଳବଦଳ ପ୍ରକ୍ରିୟାରେ ବରିଷ୍ଠ ପୋଲିସ ଅଧିକାରୀ ମଡକର ସନ୍ଦୀପ ସମ୍ପତ୍ତଙ୍କୁ ସିଆଇଡି-କ୍ରାଇମବ୍ରାଞ୍ଚର ନୂତନ ଡିଆଇଜି (DIG) ଭାବେ ନିଯୁକ୍ତ କରାଯାଇଛି। ସେହିପରି ଖୋର୍ଦ୍ଧା ଜିଲ୍ଲାର ପୋଲିସ ସୁପରିଣ୍ଟେଣ୍ଡେଣ୍ଟ (SP) ଭାବେ କାର୍ଯ୍ୟ କରୁଥିବା ବିବେକାନନ୍ଦ ଶର୍ମାଙ୍କୁ ବଦଳି କରାଯାଇ ସିଆଇଡି-କ୍ରାଇମବ୍ରାଞ୍ଚର ନୂଆ ଏସପି ଦାୟିତ୍ୱ ଦିଆଯାଇଛି। ଅପରପକ୍ଷରେ, ପୂର୍ବରୁ କ୍ରାଇମବ୍ରାଞ୍ଚ ଏସପି ଭାବେ କାର୍ଯ୍ୟରତ ଥିବା ପରମାର ସ୍ମିତଙ୍କୁ ନୟାଗଡ଼ ଜିଲ୍ଲା ଏସପି ଭାବେ ପଠାଯାଇଛି। ରାଜ୍ୟର ସ୍ପେଶାଲ ଟାସ୍କ ଫୋର୍ସ ବା ଏସଟିଏଫ୍ (STF) ର ଏସପି ଦାୟିତ୍ୱ ଏବେ ରାୟଗଡ଼ାର ପୂର୍ବତନ ଏସପି ସ୍ୱାତୀ ଏସ. କୁମାରଙ୍କୁ ପ୍ରଦାନ କରାଯାଇଛି।
ସେହିପରି ଖୋର୍ଦ୍ଧାର ପୋଲିସ ମୁଖ୍ୟ ଭାବେ ବରିଷ୍ଠ ଅଧିକାରୀ ଶୁଭେନ୍ଦୁ କୁମାର ପାତ୍ରଙ୍କୁ ନିଯୁକ୍ତି ମିଳିଥିବା ବେଳେ ଦକ୍ଷିଣ ଓଡ଼ିଶାର ପ୍ରମୁଖ ଜିଲ୍ଲା ଗଞ୍ଜାମର ନୂଆ ଏସପି ଭାବେ ହରିଶା ବି.ସି. ଦାୟିତ୍ୱ ଗ୍ରହଣ କରିବାକୁ ଯାଉଛନ୍ତି। ସେହିପରି ଗଜପତି ଜିଲ୍ଲା ପାଇଁ ପ୍ରହ୍ଲାଦ ସହାୟ ମୀନାଙ୍କୁ ନୂଆ ଏସପି କରାଯାଇଥିବା ବେଳେ, ସ୍ପେଶାଲ ବ୍ରାଞ୍ଚରେ ଥିବା ଏସପି ରାଜ ପ୍ରସାଦଙ୍କୁ ରାୟଗଡ଼ା ଜିଲ୍ଲାର ନୂତନ କମାଣ୍ଡ ପ୍ରଦାନ କରାଯାଇଛି। ଅନ୍ୟପଟେ ବୌଦ୍ଧ ଜିଲ୍ଲାର ଏସପି ରାହୁଲ ଗୋୟଲଙ୍କୁ ସ୍ପେଶାଲ ବ୍ରାଞ୍ଚର ନୂଆ ଏସପି ଭାବେ ବଦଳି କରାଯାଇଛି ଏବଂ ତାଙ୍କ ସ୍ଥାନରେ କୁଲଦୀପ ମୀନା ବୌଦ୍ଧ ଜିଲ୍ଲାର ନୂଆ ଏସପି ହୋଇଛନ୍ତି।
ଏହା ସହ କାଶ୍ୟପ ପାର୍ଥ ଜଗଦୀଶଙ୍କୁ ନବରଙ୍ଗପୁରର ନୂଆ ଏସପି କରାଯାଇଥିବା ବେଳେ ରମେନ୍ଦ୍ର ପ୍ରସାଦ କନ୍ଧମାଳ ଜିଲ୍ଲାର ନୂତନ ପୋଲିସ ମୁଖ୍ୟ ଭାବେ ଦାୟିତ୍ୱ ତୁଲାଇବେ। ପୂର୍ବରୁ ଏସଟିଏଫ୍ ଏସପି ଭାବେ କାର୍ଯ୍ୟରତ ରବୀନ୍ଦ୍ର ନାଥ ଶତପଥୀଙ୍କୁ ବରଗଡ଼ ଜିଲ୍ଲା ଏସପି ଭାବେ ବଦଳି କରାଯାଇଛି। କିଶୋର ଚନ୍ଦ୍ର ମୁଣ୍ଡେଙ୍କୁ ଦେବଗଡ଼ର ନୂଆ ଏସପି କରାଯାଇଥିବା ବେଳେ କୃଷ୍ଣ ପ୍ରସାଦ ଦାସଙ୍କୁ ରାଉରକେଲା ରେଲୱେ ଏସପି (SRP) ଭାବେ ନୂଆ ଦାୟିତ୍ୱ ମିଳିଛି।
ସେହିପରି କଟକର ଏସିପି (ACP) ଭାବେ କାର୍ଯ୍ୟରତ ଥିବା ମହିଳା ଅଧିକାରୀ ଅନନ୍ୟା ଅବସ୍ତିଙ୍କୁ ରାଜ୍ୟପାଳଙ୍କ ଏଡିସି (ADC to Governor) ଭାବେ ଏକ ବଡ଼ ଓ ସମ୍ମାନଜନକ ପଦବୀରେ ଅବସ୍ଥାପିତ କରାଯାଇଛି। ଏହା ବ୍ୟତୀତ କ୍ରାଇମବ୍ରାଞ୍ଚର ଆଉ ଜଣେ ଏସପି କୃଷ୍ଣ ପ୍ରସାଦ ପଟ୍ଟନାୟକଙ୍କୁ ସିଗନାଲ୍ସ ଏସପି (SP Signals) ଭାବେ ନୂଆ ଦାୟିତ୍ୱ ହସ୍ତାନ୍ତର କରାଯାଇଛି।