ଭୁବନେଶ୍ୱର/କଟକ: ଶେଷରେ ଅପେକ୍ଷାର ଅନ୍ତ ଘଟିଛି। ବର୍ଷର ପ୍ରଥମ ମୌସୁମୀ ବର୍ଷାରେ ଆଜି ସକାଳୁ ଭିଜିଛି ରାଜଧାନୀ ଭୁବନେଶ୍ୱର ଓ ରୌପ୍ୟ ନଗରୀ କଟକ। ଦୀର୍ଘଦିନ ଧରି ଲୋକଙ୍କୁ ଅସ୍ତବ୍ୟସ୍ତ କରୁଥିବା ଗରମ ଓ ଗୁଳୁଗୁଳି ମଧ୍ୟରେ ଏହି ବର୍ଷା ସହରବାସୀଙ୍କ ପାଇଁ ନେଇଆସିଛି ବଡ଼ ଆଶ୍ୱସ୍ତି।
ସକାଳୁ ଉଭୟ ସହରର ଆକାଶ ମେଘାଚ୍ଛନ୍ନ ରହିଥିବା ବେଳେ ବିଭିନ୍ନ ଅଞ୍ଚଳରେ ମଧ୍ୟମ ଧରଣର ବର୍ଷା ଅନୁଭୂତ ହୋଇଛି। କଟକରେ ଗତକାଲି ରାତିରୁ ଝିପିଝିପି ବର୍ଷା ଲାଗି ରହିଥିବାବେଳେ ଭୁବନେଶ୍ୱରରେ ଆଜି ସକାଳୁ ବର୍ଷାର ପ୍ରଭାବ ଦେଖିବାକୁ ମିଳିଛି। ବର୍ଷା ଯୋଗୁଁ ତାପମାତ୍ରାରେ ହ୍ରାସ ଘଟିଥିବା ସହ ସହରର ପରିବେଶ ମଧ୍ୟ ଶୀତଳ ହୋଇପଡ଼ିଛି।
କିଛି ଦିନ ଧରି ଅସହ୍ୟ ଗରମ ଓ ଆର୍ଦ୍ରତାରେ ଅତିଷ୍ଠ ହୋଇପଡ଼ିଥିବା ଲୋକମାନେ ବର୍ଷା ପରେ ସ୍ୱସ୍ତିର ନିଃଶ୍ୱାସ ନେଇଛନ୍ତି। ତେବେ ବର୍ଷା ସହ କିଛି ସମସ୍ୟା ମଧ୍ୟ ସାମ୍ନାକୁ ଆସିଛି। ସହରର କେତେକ ନିମ୍ନାଞ୍ଚଳ ଓ ପ୍ରମୁଖ ରାସ୍ତାରେ ପାଣି ଜମିବା ଯୋଗୁଁ ଯାତାୟାତ ପ୍ରଭାବିତ ହୋଇଥିଲା।
ପାଣିପାଗ ବିଭାଗର ସୂଚନା ଅନୁଯାୟୀ, ଆଗାମୀ ପାଞ୍ଚ ଦିନ ଧରି ରାଜ୍ୟର ବିଭିନ୍ନ ଜିଲ୍ଲାରେ ଘଡ଼ଘଡ଼ି ଓ ବିଜୁଳି ସହ ବର୍ଷା ଜାରି ରହିପାରେ। କେତେକ ସ୍ଥାନରେ ପ୍ରବଳ ବର୍ଷାର ସମ୍ଭାବନା ମଧ୍ୟ ରହିଛି।
ମୌସୁମୀ ବର୍ଷାର ଏହି ଆଗମନ ଚାଷୀଙ୍କ ପାଇଁ ମଧ୍ୟ ଖୁସି ଖବର ନେଇଆସିଥିବା ବେଳେ, ଆଗାମୀ କିଛି ଦିନ ରାଜ୍ୟବାସୀଙ୍କୁ ବର୍ଷାମୁଖର ପାଗର ଅନୁଭୂତି ମିଳିବ ବୋଲି ଆଶା କରାଯାଉଛି।