ଆହ୍ଲାବାଦ ହାଇକୋର୍ଟରୁ ରାହୁଲ ଗାନ୍ଧିଙ୍କୁ ଆଶ୍ୱସ୍ତି, ମୋକଦ୍ଦମା ରୁଜୁ ଲାଗି ଆବେଦନ ଖାରଜ

ଆହ୍ଲାବାଦ ହାଇକୋର୍ଟ ବରିଷ୍ଠ କଂଗ୍ରେସ ନେତା ରାହୁଲ ଗାନ୍ଧିଙ୍କୁ ଏକ ମାମଲାରେ ଆଶ୍ୱସ୍ତି ପ୍ରଦାନ କରିଛନ୍ତି। କୋର୍ଟ ସେହି ପିଟିସନକୁ ଖାରଜ କରିଦେଇଛନ୍ତି ଯେଉଁଥିରେ ରାହୁଲଙ୍କ ବିରୋଧରେ ଏକ ପୁରୁଣା ବିବାଦୀୟ ବୟାନକୁ ନେଇ ଏତଲା ରୁଜୁ କରିବା ଲାଗି ଆଦେଶ ଦେବାକୁ ହାଇକୋର୍ଟଙ୍କୁ ନିବେଦନ କରାଯାଇଥିଲା। ତେବେ କୋର୍ଟ ଏଥିରେ ସହମତ ହୋଇ ନାହାନ୍ତି ଓ ଆବେଦନକୁ ଅଗ୍ରାହ୍ୟ କରିଦେଇଛନ୍ତି। ଏଣୁ ଲୋକସଭାରେ ବିରୋଧୀ ଦଳ ନେତାଙ୍କୁ ବଡ଼ ଆଶ୍ୱସ୍ତି ମିଳିଛି।

ଜାଣନ୍ତୁ ମାମଲା କ’ଣ?

ଏହି ଆଇନଗତ ବିବାଦ ରାହୁଲ ଗାନ୍ଧିଙ୍କ ସେହି ବୟାନ ସମ୍ପର୍କିତ ଯେଉଁଥିରେ ସେ ରାଜନୈତିକ ପ୍ରତିଦ୍ୱନ୍ଦ୍ୱୀତାକୁ ପରିଭାଷିତ କରିବାକୁ ଯାଇ କହିଥିଲେ ଦେଶରେ ଏବେକା ଲଢେଇ ବିଜେପି-ଆରଏସଏସ ଓ ଭାରତୀୟ ରାଜ୍ୟଙ୍କ ମଧ୍ୟରେ ଚାଲିଛି। ତେବେ ରାହୁଲଙ୍କ ଏହି ଟିପ୍ପଣୀକୁ ନେଇ ଶାସକ ଦଳ ଓ କିଛି ସଙ୍ଗଠନ କଡ଼ା ଆପତ୍ତି କରିଥିଲେ। ଆବେଦନକାରୀମାନେ ତର୍କ ଦେଇଥିଲେ ଯେ ରାହୁଲ ଗାନ୍ଧିଙ୍କ ଏପରି ବୟାନ ସମ୍ବିଧାନିକ ସଂସ୍ଥା ଓ ଦେଶର ଛବି ବିରୋଧରେ। ଏଣୁ ତାଙ୍କ ବିରୋଧରେ ଅପରାଧିକ କାର୍ଯ୍ୟାନୁଷ୍ଠାନ କାହିଁକି କରାଯିବନି ବୋଲି ଆବେଦନକାରୀ ତର୍କ ରଖିଥିଲେ।

କୋର୍ଟଙ୍କ ନିଷ୍ପତ୍ତି

ଏହି ମାମଲାର ଶୁଣାଣି ଆହ୍ଲାବାଦ ହାଇକୋର୍ଟଙ୍କ ସିଙ୍ଗଲ ଜଜ୍ କୋର୍ଟରେ ହେଉଥିଲା। କୋର୍ଟ ପିଟିସନରେ ତର୍କ ଓ ତଥ୍ୟର ଗହନ ଅଧ୍ୟୟନ କରିବା ପରେ ତାହା ଶୁଣାଣିଯୋଗ୍ୟ ନୁହେଁ ବୋଲି ଅନୁଭବ କରିଥିଲେ। ଏଣୁ କୋର୍ଟ ମାମଲାରେ ରାହୁଲ ଗାନ୍ଧିଙ୍କ ବିରୋଧରେ ଏତଲା (ଏଫଆଇଆର) ରୁଜୁ ପାଇଁ ଆଦେଶ ଦେବାକୁ କୌଣସି ଅଧାର ନଥିବା କହି ଆବେଦନକୁ ଅଗ୍ରାହ୍ୟ କରିଦେଇଛନ୍ତି।

ରାଜନୈତିକ ପ୍ରତିକ୍ରିୟା

ହାଇକୋର୍ଟଙ୍କ ଏହି ନିଷ୍ପତ୍ତି ପରେ ଏହି ବିଶେଷ ଟିପ୍ପଣୀକୁ ନେଇ ରାହୁଲ ଗାନ୍ଧିଙ୍କ ବିରୋଧରେ ରୁଜୁ ହୋଇଥିବା ମୋକଦ୍ଦମା ହଟି ଯାଇଛି। ଆଇନ ବିଷାରଦଙ୍କ ଅନୁସାରେ ଅଭିବ୍ୟକ୍ତିର ସ୍ୱାଧୀନତା ଓ ରାଜନୈତିକ ବୟାନର ମର୍ଯ୍ୟଦା ମଧ୍ୟରେ ହାଇକୋର୍ଟଙ୍କ ଏହି ନିଷ୍ପତ୍ତି ଅତ୍ୟନ୍ତ ଗୁରୁତ୍ୱପୂର୍ଣ୍ଣ। କୋର୍ଟରୁ ଏହି ଆଶ୍ୱସ୍ତି କଂଗ୍ରେସ ଶିବିରରେ ଖୁସିର ଲହର ଖେଳାଇ ଦେଇଛି। ତେବେ ଆବେଦନକାରୀଙ୍କ ପାଖରେ ଏବେ ଉଚ୍ଚ ବେଞ୍ଚରେ ଅପିଲ କରିବାର ଶେଷ ବିକଳ୍ପ ଖୋଲା ରହିଛି।