ନେପାଳ ଜଳପ୍ରଳୟ ମୃତ୍ୟୁସଂଖ୍ୟା ୬୦୦ ପାର୍, ମୃତଦେହ ରଖିବାକୁ ନାହିଁ ପର୍ଯ୍ୟାପ୍ତ ସ୍ଥାନ

ଦିନକୁ ଦିନ ବଢିଚାଲିଛି ନେପାଳ ଜଳପ୍ରଳୟ ମୃତ୍ୟୁସଂଖ୍ୟା । ନେପାଳର ଭୟଙ୍କର ଫ୍ଲାସ୍ ଫ୍ଲଡ୍ ପରେ ସାମ୍ନାକୁ ଆସୁଛି ଭୟଙ୍କର ଚିତ୍ର । ନେପାଳ ବିପର୍ଯ୍ୟୟ ପରିଚାଳନା ବିଭାଗର ତଥ୍ୟ ଅନୁସାରେ, ଏବେ ବି ୨୦୦୦ ଲୋକଙ୍କ କୌଣସି ପତ୍ତା ମିଳୁନାହିଁ । ସେହିପରି ନେପାଳ ଜଳପ୍ରଳୟରେ ମୃତ୍ୟୁସଂଖ୍ୟା ୬୦୦ ପାର ହୋଇଛି । ୩,୭୦୦ରୁ ଅଧିକ ଲୋକଙ୍କୁ ଏପର୍ଯ୍ୟନ୍ତ ଉଦ୍ଧାର କରାଯାଇଛି । ହଜାର ହଜାର ସୁରକ୍ଷାକର୍ମୀ ଉଦ୍ଧାର ଓ ସନ୍ଧାନ ଅଭିଯାନରେ ନିୟୋଜିତ ଅଛନ୍ତି ।

ତେବେ ସ୍ଥିତି ଏଭଳି ହେଲାଣି ଯେ, ମୃତଦେହଗୁଡ଼ିକୁ ରଖିବାକୁ ପର୍ଯ୍ୟାପ୍ତ ସ୍ଥାନ ନାହିଁ । ମୃତଦେହଗୁଡ଼ିକୁ ନୁୱାକୋଟ, ଚିତୱାନ, ତାନାହୁନ ଓ ନବଲପରାସି ସମେତ କେନ୍ଦ୍ରୀୟ ନେପାଳର ବିସ୍ତୃତ ଅଞ୍ଚଳରେ ଉଦ୍ଧାର କରାଯାଇଛି । ସ୍ଥାନୀୟ ହସ୍ପିଟାଲଗୁଡ଼ିକରେ ସ୍ଥାନ ସରିଯିବା ପରେ ଅନେକ ଜିଲ୍ଲାର କର୍ତ୍ତୃପକ୍ଷ ମୃତଦେହଗୁଡ଼ିକୁ ଅନ୍ୟତ୍ର ସ୍ଥାନାନ୍ତର କରିବାକୁ ବାଧ୍ୟ ହୋଇଛନ୍ତି । ଅଧିକ ମୃତଦେହ ଉଦ୍ଧାର ହେଲେ ଏସବୁର ସଂରକ୍ଷଣ ପାଇଁ ଅସ୍ଥାୟୀ ସୁବିଧା ପ୍ରସ୍ତୁତ କରାଯାଉଛି ।

ହେଲିକପ୍ଟର ଯୋଗେ ଦୁର୍ଗମ ଅଞ୍ଚଳରୁ ଲୋକଙ୍କୁ ଉଦ୍ଧାର କରାଯିବା ସହ ଖାଦ୍ୟ ଓ ଜରୁରୀ ସାମଗ୍ରୀ ପହଞ୍ଚାଯାଉଛି । ନିଖୋଜଙ୍କ ସଂଖ୍ୟା ଏତେ ଦ୍ରୁତ ଗତିରେ ବଢ଼ିବା ଏବେ ସବୁଠାରୁ ବଡ଼ ଚିନ୍ତାର କାରଣ ପାଲଟିଛି । ବନ୍ୟାରେ ଅନେକ ଗାଁ ଓ ବସତି ବାହ୍ୟ ଜଗତରୁ ବିଚ୍ଛିନ୍ନ ହୋଇଯାଇଥିବାରୁ ପ୍ରଥମ ପର୍ଯ୍ୟାୟରେ ସେଠାକାର ସମସ୍ତ ନିଖୋଜ ବ୍ୟକ୍ତିଙ୍କ ନାମ ସରକାରୀ ତାଲିକାରେ ଆସିପାରିନଥିଲା । ବିଦେଶୀ ନାଗରିକମାନେ ମଧ୍ୟ ବହୁ ସଂଖ୍ୟାରେ ନିଖୋଜ ଅଛନ୍ତି ।

ଚୀନର ତିବ୍ବତ ପଟେ ମଧ୍ୟ ୫୫୮ ଜଣ ନିଖୋଜ ଥିବା ଚୀନ ସରକାରୀ ଗଣମାଧ୍ୟମ ସୂଚନା ଦେଇଛି । ଉଦ୍ଧାରକାରୀଙ୍କ ପାଇଁ ଚ୍ୟାଲେଞ୍ଜ ପାଲଟିଛି ମାଟି, ପଥର ଓ ଧ୍ୱଂସାବଶେଷର ସ୍ତର । ବନ୍ୟାର ପ୍ରଚଣ୍ଡ ସ୍ରୋତ ରାସ୍ତା, ସେତୁ, ଘର ଏବଂ ଜଳବିଦ୍ୟୁତ ପ୍ରକଳ୍ପକୁ ଧ୍ୱଂସ କରିଦେଇଛି । କାଦୁଅ ଓ ଭଗ୍ନାବଶେଷ ତଳେ କେହି ଜୀବିତ ଅଛନ୍ତି କି ନାହିଁ, ସେଥିପାଇଁ ଚାଲିଛି ଜୋରଦାର ସନ୍ଧାନ ।

ନେପାଳ ଜଳପ୍ରଳୟରେ ୩୨୦ରୁ ଅଧିକ ଭାରତୀୟ ନିଖୋଜ ଅଛନ୍ତି । ସେମାନଙ୍କ ସହ ଯୋଗାଯୋଗ ହୋଇ ପାରୁନାହିଁ । ଏନେଇ ଭାରତୀୟ ବୈଦେଶିକ ମନ୍ତ୍ରଣାଳୟ ସୂଚନା ଦେଇଛି । ଗତକାଲି ଉଦ୍ଧାର ହୋଇଥିବା ୨୧ ଭାରତୀୟ ଆଜି ଭାରତ ପହଞ୍ଚିଛନ୍ତି । ତେବେ ଚୀନ ପାର୍ଶ୍ବରେ ଥିବା ୪୦୦ ଭାରତୀୟ ସୁରକ୍ଷିତ ଅଛନ୍ତି । ୮୫ ଭାରତୀୟଙ୍କୁ ଉଦ୍ଧାର କରାଯାଇଛି । ଘଟଣାର ୩ୟ ଦିନରେ ମଧ୍ୟ ଉଦ୍ଧାରକାର୍ଯ୍ୟ ଜାରି ରହିଛି ।